തെച്ചിയെന്നും ചെത്തിയെന്നും വിളിക്കപ്പെടുന്ന പൂവിന് ആയുര്‍വേദത്തിലും ക്ഷേത്രാചാരങ്ങളിലും പ്രത്യേക പ്രാധാന്യമാണുള്ളത്. നിറയെ പൂക്കളോടുകൂടി കുറ്റിച്ചെടിയായി വളരുന്ന ചെത്തി പിങ്ക്, ഓറഞ്ച്, വെള്ള, ചുവപ്പ് എന്നീ നിറങ്ങളിലാണ് കാണപ്പെടുന്നത്. റൂബിയേസി കുടുംബക്കാരനായ ചെത്തിയുടെ ശാസ്ത്രനാമം ഇക്സോറ കോക്സിനിയ എന്നാണ്. ആയുര്‍വേദത്തില്‍ പല ത്വക് രോഗങ്ങള്‍ക്കുമുള്ള മരുന്നാണിത്. ഒന്നര മീറ്റര്‍ മുതല്‍ രണ്ടര മീറ്റര്‍ വരെ വളരുന്ന കുറ്റിച്ചെടിയാണിത്. വയറുവേദന , വയറിളക്കം, വ്രണം, ഗൊണോറിയ എന്നിവ ശമിപ്പിക്കാന്‍ വ്യത്യസ്ത രീതിയില്‍ ഇതിന്റെ വേരും പൂവും സമൂലവും ഉപയോഗിച്ചു വരുന്നുണ്ട്. പണ്ട് മാറാത്ത വ്രണങ്ങള്‍ക്ക് തെച്ചിപ്പൂവ് ചതച്ച് എണ്ണകാച്ചി പുരട്ടുന്ന രീതി ഉണ്ടായിരുന്നു.
എങ്ങനെ തൈകള്‍ തയ്യാറാക്കാം
ചെറിയ പോളിത്തീന്‍ കവറുകളില്‍ മണ്ണ്, ചാണകപ്പൊടി, ചകിരിച്ചോറ് എന്നിവ 3:3:3 എന്ന തോതില്‍ ചേര്‍ത്ത് തയ്യാറാക്കിയ പോട്ടിങ്ങ് മിശ്രിതം നിറയ്ക്കുക. കുറഞ്ഞത് നാലിഞ്ച് നീളത്തില്‍ വെട്ടിയെടുത്ത കമ്പുകള്‍ വൈകുന്നേരങ്ങളില്‍ നട്ട് തൈകള്‍ തയ്യാറാക്കാം. കമ്പുകള്‍ നടുന്നതിന് മുമ്പ് മുരിങ്ങയുടെ ഇലയോ തണ്ടോ ചതച്ചതിന്റെ നീരില്‍ ഒരു മണിക്കൂര്‍ മുക്കിവെച്ചാല്‍ പെട്ടെന്ന് വേരു പിടിക്കും. കമ്പു നട്ടു കഴിഞ്ഞ് രണ്ടാഴ്ച കൊണ്ട് വേരു പിടിക്കുകയും 20 ദിവസം കൊണ്ട് പുതിയ ഇലകള്‍ വരികയും ചെയ്യും. മൂന്ന് പുതിയ ഇലകള്‍ വന്നു കഴിഞ്ഞാല്‍ ചട്ടിയിലേക്കോ പൂന്തോട്ടത്തിലേക്കോ മാറ്റി നടാം.
മഴക്കാലത്ത് പൂന്തോട്ടത്തില്‍ ഒരടി ആഴവും വീതിയും നീളവുമുള്ള കുഴികളെടുത്ത് അതില്‍ ചാണകപ്പൊടിയും മണലും സമാസമം നിറച്ചതിനുശേഷം അതില്‍ 100 ഗ്രാം വേപ്പിന്‍ പിണ്ണാക്ക് 50 ഗ്രാം ഡോളമെറ്റ് എന്നിവ ചേര്‍ക്കുക. നന്നായി നനച്ച ശേഷം കുഴികളില്‍ കൊമ്പുകള്‍ നടാം. ആദ്യ രണ്ടുദിവസം അല്പം തണലു നല്‍കുന്നത് നല്ലതാണ്. നന്നായി പടര്‍ന്നു പന്തലിച്ചു വളരുന്ന ഇവയില്‍ നിറയെ പൂക്കളുണ്ടാകാന്‍ കൊമ്പു കോതിക്കൊടുക്കുന്നത് നല്ലതാണ്. ചുവട്ടില്‍ ഒന്നരയടി വിട്ട് തടമെടുത്തതിന് ശേഷം രണ്ടുമാസം കൂടുമ്പോള്‍ ഒരിക്കല്‍ രണ്ടുകിലോ ചാണകപ്പൊടി, 250 ഗ്രാം കടലപ്പിണ്ണാക്ക് എന്നിവ നല്‍കാം.
ശലഭപ്പുഴുക്കളാണ് തെച്ചിയെ ബാധിക്കുന്ന പ്രധാന കീടം. ഇവ തളിരിലകളെ ആക്രമിക്കുന്നു. വേപ്പെണ്ണ എമെല്‍ഷന്‍ ഉപയോഗിച്ച് അവയെ തുരത്താം.
Discussion about this post