കൃഷിയും സാങ്കേതികവിദ്യയും കൈകോർത്തപ്പോൾ: വായനാടൻസ് കുറിച്ച പുതു  ചരിത്രം

വയനാടിന്റെ മടിത്തട്ടിൽനിന്നു ഉദിച്ചുയർന്നു ഇന്ന് ലോകം കീഴടക്കിയ സംരഭം ആരോഗ്യകരമായ ഭക്ഷണ സംസ്കാരത്തെ മുൻനിർത്തി കേരളത്തിന്റെ കാർഷിക വിഭവങ്ങളെ  ലോകവിപണിയിലെത്തിച്ച   ഒരു യുവസങ്കൽപ്പം. കൃഷിയും സാങ്കേതികവിദ്യയും കൈകോർത്തപ്പോൾ, മണ്ണിന്റെ മണവും മനുഷ്യന്റെ മനസ്സും ചേർന്നപ്പോൾ വയനാടിന്റെ മണ്ണിൽ  പുതിയ കഥ രചിക്കപ്പെട്ടു.

2016-ൽ ഐ ടി പ്രൊഫെഷണൽസ് ആയ 3  യുവാക്കളുടെ മനസ്സിൽ പിറന്ന ഈ സംരംഭം, വെറും ബിസിനസ് ആശയമല്ലായിരുന്നു. അത് ഒരു ചോദ്യം ആയിരുന്നു — “നമ്മുടെ നാട്ടിൻപുറത്തെ വിഭവങ്ങൾക്ക് എന്തുകൊണ്ട് ലോകമൊട്ടാകെ ഒരു വേദി ലഭിക്കരുത്?” അങ്ങനെ വയനാടൻസ് എന്ന വയനാട് ഓർഗാനിക് റിസർച്ച് പ്രൈവറ്റ് ലിമിറ്റഡ് എന്ന കമ്പനി രൂപംകൊണ്ടു . സഹോദങ്ങളായ ജിതിൻ കാന്തും , നിതിൻ കാന്തും സുഹൃത്ത് അരുൺ ചന്ദ്രനും ചേർന്നാണ് വയനാടൻസിന് തുടക്കം കുറിച്ചത് . ചക്ക ഉൾപ്പെടെയുള്ള കേരളത്തിന്റെ തനത് കാർഷിക വിഭവങ്ങളെ ചിപ്സ് രൂപത്തിൽ ആഗോള വിപണിയിലെത്തിക്കുകയായിരുന്നു ലക്‌ഷ്യം . എണ്ണയിൽ മുക്കിയ ഭക്ഷണങ്ങളുടെ ആരോഗ്യപ്രശ്നങ്ങൾക്കിടയിൽ, അവർ തിരഞ്ഞെടുത്ത വഴി വ്യത്യസ്തമായിരുന്നു. വാക്വം ഫ്രൈയിംഗ് (Vacuum Frying) എന്ന സാങ്കേതികവിദ്യയാണ്. അവർ ഇതിനായി ഉപയോഗിച്ചത്

സാധാരണ ചിപ്‌സുകൾ ഉയർന്ന താപനിലയിൽ വറുത്തെടുക്കുമ്പോൾ അവയിലെ പോഷകങ്ങൾ നഷ്ടപ്പെടുകയും എണ്ണയുടെ അംശം കൂടുകയും ചെയ്യുന്നു. എന്നാൽ വാക്വം പ്രക്രിയയിലൂടെ വായുമർദ്ദം കുറഞ്ഞ അന്തരീക്ഷത്തിൽ, കേവലം 60°C – 90°C താപനിലയിൽ പാകം ചെയ്യുന്നതിലൂടെ പഴങ്ങളുടെയും പച്ചക്കറികളുടെയും സ്വാഭാവിക നിറം, രുചി, വിറ്റാമിനുകൾ എന്നിവ അതേപടി നിലനിർത്താൻ സാധിക്കുന്നു. എണ്ണയുടെ സാന്നിധ്യം ഗണ്യമായി കുറവായതിനാൽ (Low Oil Content), അർബുദത്തിന് കാരണമായേക്കാവുന്ന കാർസിനോജനുകളെ ഒഴിവാക്കാനും ഹൃദയാരോഗ്യത്തിന് അനുയോജ്യമായ രീതിയിൽ ഉൽപ്പന്നങ്ങൾ തയ്യാറാക്കാനും ഈ സാങ്കേതികവിദ്യ വായനാടൻസിനെ സഹായിക്കുന്നു. ആരോഗ്യകരമായ ലഘുഭക്ഷണം (Healthy Snacking) എന്ന പുതിയൊരു സംസ്കാരത്തിന് കേരളത്തിൽ തുടക്കമിടാൻ ഈ നൂതന മാർഗ്ഗത്തിലൂടെ ഇവർക്ക് സാധിച്ചു.തിയ രൂപത്തിൽ ജനങ്ങൾക്കുമുന്നിലെത്തി.

ഐ.ടി. മേഖലയിലെ പ്രാവീണ്യവും അനുഭവസമ്പത്തും വയനാടൻസിന്റെ വളർച്ചയിൽ നിർണായക പങ്കുവഹിച്ചു. സാങ്കേതികവിദ്യയുടെ ശക്തി മനസ്സിലാക്കിയ സംരംഭകർ, ഉൽപ്പാദനത്തിൽ മാത്രമല്ല വിപണനത്തിലും ഡിജിറ്റൽ പ്ലാറ്റ്ഫോമുകൾ ഫലപ്രദമായി ഉപയോഗിച്ചു. ഡാറ്റയെ ആസ്പദമാക്കിയ വിപണി വിശകലനം, ഉപഭോക്തൃ പ്രവണതകളുടെ കൃത്യമായ പഠനം, ഓൺലൈൻ ബ്രാൻഡിംഗ്, ഇ-കൊമേഴ്സ് വ്യാപനം തുടങ്ങിയ മേഖലകളിൽ അവർ നേടിയ ഐ.ടി. പരിജ്ഞാനം, ഉൽപ്പന്നങ്ങളെ വേഗത്തിൽ ആഗോള വിപണിയിലെത്തിക്കാൻ സഹായിച്ചു. കൂടാതെ, സപ്ലൈ ചെയിൻ മാനേജ്മെന്റ്, ഗുണനിലവാര നിയന്ത്രണം, ട്രേസബിലിറ്റി എന്നിവയും സാങ്കേതികവിദ്യയുടെ സഹായത്തോടെ കൂടുതൽ കാര്യക്ഷമമാക്കാൻ കഴിഞ്ഞു. ഇതിലൂടെ ഒരു പരമ്പരാഗത കാർഷിക ഉൽപ്പന്നത്തെ ആധുനിക ബിസിനസ് മോഡലിലേക്ക് മാറ്റിയെടുക്കാൻ സാധിക്കുകയും, വയനാടൻസിനെ ഒരു ശക്തമായ ഗ്ലോബൽ ബ്രാൻഡാക്കി ഉയർത്തുകയും ചെയ്തു.

വയനാടൻസ് കഥയുടെ ഹൃദയം കർഷകനാണ്. മണ്ണിൽ വിത്ത് വിതച്ച്, കാലാവസ്ഥയുടെ അനിശ്ചിതത്വങ്ങളോട് പൊരുതി നിൽക്കുന്ന കർഷകന്റെ കയ്യിൽ നിന്നാണ് ഇവരുടെ ഉൽപ്പന്നങ്ങൾ ആരംഭിക്കുന്നത്. ചക്ക, മാങ്ങ, കാരറ്റ്, ബീറ്റ്റൂട്ട് — ഓരോന്നും കർഷകന്റെ പ്രയത്‌നത്തിന്റെ അടയാളമാണ്. വയനാടൻസ് ഈ കൈകളെ ഉപേക്ഷിച്ചില്ല; മറിച്ച്, അവയെ ശക്തിപ്പെടുത്തി. ഇടനിലക്കാരുടെ ചങ്ങലകൾ ഒഴിവാക്കി, കർഷകരിൽ നിന്ന് നേരിട്ട് ശേഖരണം നടത്തിയത്, ഒരു വ്യാപാര തന്ത്രം മാത്രമല്ല, ഒരു സാമൂഹിക ഉത്തരവാദിത്വത്തിന്റെ പ്രഖ്യാപനമായിരുന്നു. കർഷകന്റെ മുഖത്ത് ഉറപ്പിന്റെ ഒരു പുഞ്ചിരി വരുത്തിയപ്പോൾ, ഉപഭോക്താവിന് ലഭിച്ചത് വിശ്വാസത്തോടെ കഴിക്കാവുന്ന ഒരു ഭക്ഷണമാണ്.

വയനാടൻസിന്റെ വളർച്ചയുടെ പിന്നിൽ നിൽക്കുന്ന മറ്റൊരു ഘടകം  അവരുടെ സ്ത്രീ ശാക്തീകരണത്തെ ആസ്പദമാക്കിയ സാമൂഹിക ഇടപെടൽ ആണ് ഉൽപ്പാദനത്തിനാവശ്യമായ കാർഷിക ഉൽപ്പങ്ങൾ  , നാട്ടിലെ സ്ത്രീശക്തിയെ കൂട്ടുപിടിച്ചാണ് അവർ കണ്ടെത്തുന്നത് . ചിപ്‌സ് നിർമ്മാണത്തിന് ആവശ്യമായ വെണ്ടക്ക പോലുള്ള വിളകൾ ഇന്ന് കുടുംബശ്രീയുടെ നേതൃത്വത്തിൽ ഏകദേശം 20 ഏക്കറിലധികം സ്ഥലങ്ങളിൽ കൃഷി ചെയ്യപ്പെടുമ്പോൾ, 150ഓളം കുടുംബശ്രീ അംഗങ്ങൾ ഈ കൂട്ടായ്മയുടെ ഭാഗമാകുന്നു. ഒപ്പം തന്നെ കർഷകർക്ക് ആവശ്യമായ  പരിശീലനവും    വിത്തുകളും  വയനാടൻസ് തന്നെ എത്തിച്ചുനൽകുകയും, അവർ ഉൽപ്പാദിപ്പിക്കുന്ന വിളകൾക്ക് വിപണിയിലെ അനിശ്ചിതത്വങ്ങളെ മറികടന്ന് മികച്ച വില ഉറപ്പാക്കുകയും ചെയ്യുന്നു. ഇതിലൂടെ സ്ത്രീകൾക്ക് സ്ഥിരമായ വരുമാനവും സാമ്പത്തിക സ്വാതന്ത്ര്യവും ലഭിക്കുന്നതോടൊപ്പം, കൃഷിയും സംരംഭവും സമൂഹവും തമ്മിലുള്ള ബന്ധം കൂടുതൽ ശക്തിപ്പെടുന്നു. അതുകൊണ്ട് തന്നെ വയനാടൻസിന്റെ ഈ മാതൃക, ഗ്രാമീണ സ്ത്രീകളെ സാമ്പത്തികമായും സാമൂഹികമായും മുന്നോട്ടുകൊണ്ടുവരുന്ന സുസ്ഥിര വികസനത്തിന്റെ പ്രചോദനാത്മക ഉദാഹരണമാണ്.

ഈ യാത്രയിൽ വെല്ലുവിളികൾ ഇല്ലാതിരുന്നില്ല. കാലാവസ്ഥ വ്യതിയാനത്തിന്റെ അനിയന്ത്രിത സ്വഭാവം, ചക്കയുടെ ലഭ്യതയെ തന്നെ ബാധിച്ചു. ഒരു സംരംഭം ഇവിടെ തളർന്നുപോകാമായിരുന്നു. പക്ഷേ വയനാടൻസ് പിന്നോട്ടില്ല. അവർ മണ്ണിലേക്ക് തിരിഞ്ഞു. 2 വർഷംകൊണ്ട് വിളവ് ലഭിക്കുന്ന വിയറ്റ്നാ ഏർലി ഇനത്തിൽപ്പെട്ട 1 ലക്ഷത്തിലധികം തൈകൾ കർഷകർക്ക് വിതരണം ചെയ്തു ഒപ്പം തന്നെ കോഴിക്കോട് നന്മണ്ടയിൽ 5 ഏക്കർ സ്ഥലത്തു നേരിട്ട് പ്ലാവ് കൃഷിയും തുടങ്ങി . ഭാവിയെ മുൻകൂട്ടി ഒരുക്കുന്ന ഒരു ദീർഘവീക്ഷണമാണ് അവർ സ്വീകരിച്ചത്. ഒരു വ്യവസായ സംരംഭം കൃഷിയുടെ ഭാവി തന്നെ രൂപപ്പെടുത്താൻ ശ്രമിക്കുന്ന അപൂർവ ഉദാഹരണമായി ഇത് മാറി.

ഇന്ന് വയനാടൻസ് ഒരു പേരല്ല, ഒരു പരിണാമമാണ്. വയനാത്തിന്റെ മടിത്തട്ടിൽ  നിന്ന് ഉയർന്ന ഈ ബ്രാൻഡ്, ഇന്ത്യയുടെ അതിർത്തികൾ കടന്ന് ഗൾഫ് രാജ്യങ്ങളിലേക്കും യൂറോപ്പിലേക്കും ഓസ്‌ട്രേലിയയിലേക്കും യാത്ര ചെയ്തിരിക്കുന്നു. ഓരോ പാക്കറ്റിലും അടങ്ങിയിരിക്കുന്നത് ഒരു രുചി മാത്രമല്ല, ഒരു നാട്ടിന്റെ ആത്മാവാണ്. “Good Health through Good Food” എന്ന അവരുടെ ആശയം, ഒരു മുദ്രാവാക്യം മാത്രമല്ല, ഒരു ജീവിതശൈലിയായി മാറുന്നു. കേവലം ചക്ക ചിപ്സിൽ തുടങ്ങിയ വയനാടൻസ് ഇന്ന് വെണ്ടക്ക, ബീറ്റ്റൂട്ട് ,കാരറ്റ് തുടങ്ങിയ ചിപ്സുകളും  വയനാടൻ കാപ്പി, കൂവപ്പൊടി, ഫാഷൻ ഫ്രൂട്ട്, തേൻ, ചക്കക്കുരു പൊടി ഉൾപ്പെടെ നൂറിലധികം ഉൽപ്പന്നങ്ങളാണ്  രാജ്യാന്തര വിപണിയിലെത്തിക്കുന്നത് . എങ്ങനെ കേരളത്തിന്റെ തനതു വിഭവങ്ങളും രുചിക്കൂട്ടുകളും വിപണിയിലെത്തിക്കുന്ന വഴി ഓരോ വർഷവും കോടികളുടെ വരുമാനമാണ് എന്ന് വയനാട് ഓർഗാനിക് റിസർച്ച് പ്രൈവറ്റ് ലിമിറ്റഡ് എന്ന കമ്പനി നേടുന്നത്.

വയനാടൻസ് നമ്മോട് പറയുന്നത് വളരെ ലളിതമാണ് — മഹത്തായ ആശയങ്ങൾ നഗരങ്ങളിൽ മാത്രം പിറക്കണമെന്നില്ല; അവ മണ്ണിന്റെ മണത്തോടുകൂടി ഗ്രാമങ്ങളിലും പിറക്കും. കൃഷിയെ ഒരു പിന്നാക്ക മേഖലയായി കാണാതെ, അതിനെ സാങ്കേതികവിദ്യയുടെ സഹായത്തോടെ പുതുക്കിയെടുക്കുമ്പോൾ, അതിൽ അനന്ത സാധ്യതകൾ തുറക്കുന്നു. യുവതലമുറയ്ക്ക് ഇത് ഒരു ക്ഷണമാണ് — സ്വന്തം നാട്ടിലേക്ക് തിരിഞ്ഞുനോക്കാൻ, അവിടെയുള്ള സാധ്യതകളെ തിരിച്ചറിയാൻ. “ചക്ക” എന്ന സാധാരണ ഫലം, ഒരു ലോകോത്തര ഉൽപ്പന്നമായി മാറുമ്പോൾ, അത് ഒരു സാമ്പത്തിക വിജയം മാത്രമല്ല. അത് ഒരു സംസ്കാരത്തിന്റെ പുനരുജ്ജീവനമാണ്. വയനാടൻസ് അതിന്റെ സാക്ഷ്യമാണ് — മണ്ണിൽ വിശ്വാസം ഉണ്ടെങ്കിൽ, സ്വപ്നങ്ങൾക്കും വേര്  പിടിക്കും