അന്നം തരുന്നവനാണ് കര്‍ഷകന്‍. കര്‍ഷകന്റെ വിയര്‍പ്പിന്റെ വിലയാണ് നാം ഓരോരുത്തരും കഴിക്കുന്ന ഭക്ഷണം. എന്നാല്‍ രാജ്യത്ത് കര്‍ഷകര്‍ അനുഭവിക്കുന്ന ദുരിതങ്ങള്‍ക്ക് മാത്രം ഒരുകാലത്തും അറുതിയില്ല. എങ്കിലും കര്‍ഷകര്‍ക്കായുള്ള ശബ്ദങ്ങള്‍ പല ദിക്കുകളില്‍ നിന്നും ഉയരുന്ന കാലമാണിത്. പ്രതിസന്ധികള്‍ക്കിടയിലും കര്‍ഷകര്‍ക്ക് പ്രചോദനമേകുന്ന തരത്തിലുള്ള സിനിമകളും പുറത്തിറങ്ങാറുണ്ട്. ഇപ്പോഴിതാ കര്‍ഷകര്‍ക്ക് ആദരമര്‍പ്പിച്ച് രംഗത്ത് വന്നിരിക്കുകയാണ് ബോളിവുഡ് സൂപ്പര്‍സ്റ്റാര്‍ സല്‍മാന്‍ ഖാന്‍.
സോഷ്യല്‍മീഡിയയില്‍ ചിത്രം സഹിതമാണ് സല്‍മാന്‍ പോസ്റ്റ് ചെയ്തിരിക്കുന്നത്. ദേഹമാസകലം ചെളി പുരണ്ട നിലയിലുള്ള ചിത്രമാണിത്. ‘എല്ലാ കര്‍ഷകരോടും ബഹുമാനം’ എന്ന അടിക്കുറിപ്പോടെയാണ് സല്‍മാന്‍ ചിത്രം പങ്കുവെച്ചിരിക്കുന്നത്. പന്‍വേലിലെ തന്റെ ഫാംഹൗസില്‍ നിന്നാണ് സല്‍മാന്‍ ഈ ചിത്രം പകര്‍ത്തിയത്. സല്‍മാന്റെ പോസ്റ്റിന് സോഷ്യല്‍മീഡിയയില്‍ സമ്മിശ്ര പ്രതികരണമാണ് ലഭിച്ചിരിക്കുന്നത്.
ലോക്ഡൗണ്‍ കാലം സല്‍മാന്‍ ഖാന്‍ കൃഷിക്കായി സമയം കണ്ടെത്തുകയാണെന്ന റിപ്പോര്‍ട്ട് നേരത്തെ വന്നിരുന്നു. കൃഷിയിലേര്‍പ്പെടുന്നതിന്റെ ചിത്രങ്ങള്‍ സല്‍മാന്‍ പങ്കുവെക്കുകയും ചെയ്തിരുന്നു. കഴിഞ്ഞ ദിവസം ലോനാവ്‌ലയിലുള്ള ഫാമില്‍ കൃഷിപ്പണികള്‍ ചെയ്ത് സമയം ചെലവിടുന്ന ചിത്രങ്ങളും സല്‍മാന്‍ പങ്കുവെച്ചിരുന്നു.
Discussion about this post