കൃഷിയിടങ്ങളിൽ സബ്സിഡി നിരക്കിൽ സോളാർ പമ്പുകൾ സ്ഥാപിക്കാം;അറിയാം പി എം കുസും പദ്ധതി

കേന്ദ്രസർക്കാരിൻറെ നവീന ഊർജ്ജമന്ത്രാലയത്തിന് കീഴിലുള്ള ഊർജ്ജ പദ്ധതികളുടെ സംസ്ഥാനതല നോഡൽ ഏജൻസിയാണ് ANERT കേരള സർക്കാർ. കേന്ദ്രസർക്കാർ പ്രഖ്യാപിച്ച പി. എം കുസും പദ്ധതിയുടെ ഭാഗമായി കേരളത്തിൽ പ്രവർത്തിക്കുന്നത് അനെർട്ടാണ്. കേന്ദ്രസർക്കാരിൻറെ ഭാഗമായി നടപ്പിലാക്കുന്ന പ്രധാനമന്ത്രി കിസാൻ ഊർജ്ജ സുരക്ഷ ഏവം ഉത്ഥാൻ മഹാഭിയാൻ (പി. എം. കുസും) പദ്ധതിയുടെ ഭാഗമായി നിലവിലുള്ള വൈദ്യുതിയിൽ പ്രവർത്തിക്കുന്ന പമ്പുകളെ സൗരോർജ്ജവൈദ്യുതിയിലേക്ക് മാറ്റുവാനും വൈദ്യുതി എത്താത്ത ഇടങ്ങളിലെ ഡീസൽ പമ്പുകൾ സൗരോർജ്ജത്തിലേക്ക് മാറ്റുന്ന പ്രവർത്തിയും കേരള സർക്കാരിന് വേണ്ടി നടപ്പിലാക്കുന്നത് അനെർട്ടാണ്.

അനർട്ട് നടപ്പിലാക്കുന്ന പി. എം കുസും പദ്ധതി

1. ഡീസൽ പമ്പുകൾ സൗരോർജ്ജ പമ്പുകൾ ആക്കുന്ന പദ്ധതി

വൈദ്യുതീകരിക്കാത്ത കൃഷിയിടങ്ങളിലുള്ള 1 HP മുതൽ 7.5 HP വരെയുള്ള ഡീസൽ പമ്പുകൾ സൗരോർജ്ജ പമ്പുകളായി മാറ്റി സ്ഥാപിക്കാൻ കർഷകരെ സഹായിക്കുന്ന കാർഷിക പദ്ധതിയാണ് ഇത്. ഈ പദ്ധതിക്ക് ആവശ്യമായ സൗരോർജ് പമ്പ് സ്ഥാപിക്കുന്നതിന് വേണ്ട തുകയുടെ 30% കേന്ദ്ര സബ്സിഡിയും 30% സംസ്ഥാന സബ്സിഡിയുമായി ലഭിക്കും. ഉപഭോക്തൃ പങ്കാളിത്തമായി ബാക്കി തുക നൽകണം. ഈ പദ്ധതി പ്രകാരം സ്ഥാപിച്ചു നൽകുന്ന പമ്പുകൾക്കും അനുബന്ധ ഉപകരണങ്ങൾക്കും അഞ്ചുവർഷ വാറണ്ടി കർഷകനെ ലഭിക്കും. ഈ പദ്ധതി നടപ്പിലാക്കുന്നത് ANERT ആണ്.

2. നിലവിലുള്ള വൈദ്യുത പമ്പുകളുടെ സൗരോർജ്ജവൽക്കരണം

വൈദ്യുതി കണക്ഷനുള്ള കൃഷിയിടങ്ങളിലെ വൈദ്യുതിയിൽ പ്രവർത്തിക്കുന്ന 1 HP മുതൽ 7.5 HP വരെയുള്ള പമ്പുകൾ സൗരോർജ്ജ വൽക്കരിക്കുന്നതിനുള്ള പദ്ധതിയാണിത്. സാമ്പത്തിക ബുദ്ധിമുട്ട് നേരിടുന്ന സംസ്ഥാനത്തെ കർഷകർക്ക് മേൽപ്പറഞ്ഞ പദ്ധതി ആനുകൂല്യം നഷ്ടമാകരുത് എന്ന ലക്ഷ്യത്തോടെ പദ്ധതിയുടെ ബെഞ്ച് മാർക്ക് തുകയുടെ 30% കേന്ദ്ര സബ്സിഡിയായി നൽകുകയും ബാക്കിവരുന്ന പദ്ധതി തുക നബാർഡിൻറെ RIDF ടീമിൽ ലോണായി അനർട്ട് കണ്ടെത്തുകയും ആണ് ചെയ്യുന്നത്. ഈ പദ്ധതി പ്രകാരം കർഷകർക്ക് യാതൊരുവിധ സാമ്പത്തിക ബാധ്യതകളും ഉണ്ടാകില്ല. മാത്രമല്ല ലോൺ കാലാവധി കഴിയുന്ന മുറക്ക് കേരള വൈദ്യുതി റഗുലേറ്ററി കമ്മീഷൻ നിശ്ചയിച്ച യൂണിറ്റ് നിരക്കിൽ KSEBL ന് വൈദ്യുതി നൽകുന്നതിലൂടെ കർഷകന് അധിക വരുമാനം ലഭിക്കുന്നതാണ്. ഇതിനായി 5 ഏക്കറിൽ താഴെയുള്ള സൗജന്യ വൈദ്യുതി ലഭിക്കുന്ന കർഷകരെയാണ് പരിഗണിക്കുന്നത്. ഈ പദ്ധതിയിൽ പങ്കുചേരാൻ കർഷകൻ പണം മുടക്കേണ്ടതില്ല. തൻറെ കൃഷിയിടത്തിലോ മറ്റു അനുയോജ്യമായ സ്ഥലത്തോ സൗരോർജ പാനൽ സ്ഥാപിക്കാനുള്ള അനുമതിപത്രം മാത്രം നൽകിയാൽ മതി. കർഷകന്റെ ഉപയോഗം കഴിഞ്ഞ് ബാക്കിയുള്ള വൈദ്യുതി KSEBL ന് നൽകുന്നതിൽ നിന്ന് ലഭിക്കുന്ന വരുമാനമാണ് വായ്പയുടെ തിരിച്ചടവിനായി ഉപയോഗിക്കുന്നത്.

ഒരു KWp സൗരോർജ്ജം നിലയത്തിന് 10 സ്ക്വയർ മീറ്റർ എന്ന നിലയ്ക്ക് നിഴൽ രഹിത സ്ഥലം ഉണ്ടായിരിക്കണം. ഇങ്ങനെ തിരഞ്ഞെടുത്ത സ്ഥലം വൈദ്യുതി മീറ്ററിന്റെ 25 മീറ്റർ ചുറ്റളവിൽ ഉള്ളതാണ് അഭികാമ്യം. സൗരോർജ്ജ നിലയത്തിന്റെ അനുബന്ധ ഉപകരണങ്ങൾ സ്ഥാപിക്കുവാനുള്ള സൗകര്യവും ശേഷിയും പമ്പ് ഹൗസിനോ കെട്ടിടത്തിനോ ഉണ്ടായിരിക്കണം. കേരളത്തിലെ ചെറുകിട കർഷകരുടെ പമ്പ് കപ്പാസിറ്റിയ്ക്ക് അനുസൃതമായി 2kWp, 5kWp, 7kWp, 20kWp എന്നിങ്ങനെ പ്ലാൻറ് അനുവദിക്കുന്നതാണ്.

ഈ പദ്ധതിയുടെ ഭാഗമാകുവാനുള്ള മാനദണ്ഡങ്ങൾ

1. കാർഷിക വൈദ്യുതി കണക്ഷൻ (5A, 5ഭ താരിഫ് പ്ലാൻ പ്രകാരം) എടുത്തിട്ടുള്ളതും, കാർഷികവകുപ്പിന്റെ സൗജന്യ പദ്ധതിയിൽ ഉൾപ്പെട്ടിട്ടുള്ളതുമായ കർഷകർ.

2. 5 ഏക്കറിൽ താഴെയോ അല്ലെങ്കിൽ 30 സെന്റിൽ കുറയാതെ കൃഷി ചെയ്യുന്ന കർഷകർ.

3. ഈ പദ്ധതിയിൽ പങ്കാളികളാവാൻ കർഷകന് കൃഷി വകുപ്പിൽ നിന്നുള്ള അംഗീകാരം ആവശ്യമാണ്.

ഈ പദ്ധതിയുടെ ഭാഗമാകുന്നത് മൂലമുള്ള ആനുകൂല്യങ്ങൾ

1. ലോൺ കാലാവധി കഴിയുമ്പോൾ കർഷകന് സൗരോർജനിലയത്തിന്റെ പൂർണ്ണ ഉടമസ്ഥാവകാശം ലഭിക്കും. പമ്പ് ഉപയോഗത്തിനനുസരിച്ച് 7 മുതൽ 10 വർഷ കാലാവധിക്കുള്ളിൽ കർഷകന് പ്ലാൻറ് സ്വന്തമാക്കും.

2. ലോൺ കാലാവധി തീരുന്ന മുറയ്ക്ക് കർഷകർക്ക് ഉൽപാദന വരുമാനം പൂർണതോതിൽ ലഭ്യമാകും.

3. മാറിവരുന്ന കാർഷിക നയങ്ങളോ സബ്സിഡിയോ കർഷകനെ ബാധിക്കില്ല. വൈദ്യുതി ലഭ്യതയിൽ സ്വയം പര്യാപ്തത നേടാം.

കർഷകർ ശ്രദ്ധിക്കേണ്ട കാര്യങ്ങൾ

സൗരോർജ പാനലുകളുടെ പൂർണ്ണ ഉത്തരവാദിത്വം കർഷകർക്ക് ആണ്. പാനലുകൾക്ക് ഏതെങ്കിലും വിധത്തിൽ കേടുപാടുകൾ സംഭവിച്ചാൽ സൗരോർജ്ജം നിലയം സ്ഥാപിച്ച കമ്പനിയെയോ അനെർട്ടിനെയോ അറിയിക്കുക.

ബന്ധപ്പെടേണ്ട നമ്പർ- 1800 425 1803, 0471-2338077

Content Summery : PM-KUSUM (Pradhan Mantri Kisan Urja Suraksha evam Utthaan Mahabhiyan) Scheme is aimed at ensuring energy security for farmers in India. Under this scheme, Government provide subsidy for installing solar pumbs in agriculture fields.