നാട്ടു മാന്തോപ്പുകളുമായി കൃഷി വകുപ്പ്

വിവിധ ഇനത്തിൽപ്പെട്ട മാവിനങ്ങളെ സംരക്ഷിക്കുന്നതിനായി 100 നാട്ടു മാന്തോപ്പുകൾ എന്ന പദ്ധതിയുമായി എത്തിയിരിക്കുകയാണ് കൃഷി വകുപ്പ്. ഇരുന്നൂറ്റി അൻപതോളം വ്യത്യസ്തമാർന്ന മാവിനങ്ങൾ കേരളത്തിലുണ്ട്. എന്നാൽ അവയെല്ലാമിന്ന് അന്യം നിന്ന് പോകുന്ന അവസ്ഥയിലാണ്. ഈ സാഹചര്യത്തിലാണ് 100 ഇനം മാവിൻ തൈകളുള്ള ഒരു മാന്തോപ്പ് ഓരോ പഞ്ചായത്തിലും നട്ടുവളർത്തുക എന്ന ആശയവുമായി കൃഷിവകുപ്പ് രം​ഗത്തെത്തിയിരിക്കുന്നത്.

തെരഞ്ഞെടുക്കപ്പെട്ട 100 പഞ്ചായത്തുകളിലാണ് ആദ്യ ഘട്ടത്തിൽ ഈ പദ്ധതി നടപ്പിലാക്കുക. പരിസ്ഥിതി സംരക്ഷണത്തിന്റെ മുന്നണി പ്പോരാളിയിരുന്ന സുഗതകുമാരി ടീച്ചറുടെ നാമത്തിലായിരിക്കും പദ്ധതി അറിയപ്പെടുക. സുഗതകുമാരി സ്മാരക നാട്ടു മാന്തോപ്പുകൾ എന്നു പേരിട്ടിരിക്കുന്ന ഈ പദ്ധതി അടുത്ത മാസം മുതൽ കൃഷി വകുപ്പ് ആരംഭിക്കുമെന്നാണ് കൃഷിമന്ത്രി വി.എസ്. സുനിൽകുമാർ അറിയിച്ചിരിക്കുന്നത്.