ഇന്‍ഡോര്‍ പ്ലാന്റുകള്‍ ഇന്ന് ട്രെന്‍ഡാണ്. വീടിനുള്ളില്‍ പച്ചപ്പുണ്ടാകുമെന്നത് മാത്രമല്ല, ശുദ്ധവായുവും പോസിറ്റീവ് എനര്‍ജിയും പ്രദാനം ചെയ്യാനും ഇന്‍ഡോര്‍ പ്ലാന്റുകള്‍ക്ക് സാധിക്കുന്നു. ഇന്‍ഡോര്‍ പ്ലാന്റിംഗിന് കുറച്ചുകൂടി ഭംഗി കൂട്ടുന്നതാണ് ടെറേറിയം. ഗ്ലാസ് പാത്രവും വളര്‍ത്താനുള്ള ചെടികളും അലങ്കാര വസ്തുക്കളുമുണ്ടെങ്കില്‍ മനോഹരമായ കുഞ്ഞന്‍പൂന്തോട്ടം വീടിനുള്ളില്‍ ഒരുക്കാമെന്നതാണ് ടെറേറിയത്തിനെ വ്യത്യസ്തമാക്കുന്നത്.
വെളിച്ചമുള്ള സ്ഥാനമാണ് ടെറേറിയം വെക്കാന്‍ തെരഞ്ഞെടുക്കേണ്ടത്. എന്നാല്‍ സൂര്യപ്രകാശം നേരിട്ട് ലഭിക്കുന്ന സ്ഥലമായിരിക്കരുത്.
എ.സി ഉള്ള മുറിയില്‍ ടെറേറിയം വെക്കരുത്. പൊടി, പുക, വാതകങ്ങള്‍ ,പെട്ടെന്നുള്ള താപവ്യതിയാനം എന്നിവയില്‍ നിന്ന് സംരക്ഷിക്കാന്‍ ടെറേറിയത്തില്‍ വളരുന്ന ചെടികള്‍ക്ക് കഴിയും. രണ്ടു തരത്തിലാണ് ടെറേറിയമുള്ളത്. ചില്ലുഭരണിയില്‍ അടച്ചുസൂക്ഷിക്കുന്നതും പകുതി തുറന്ന പാത്രത്തിലുള്ളതും. പകുതി തുറന്ന ടെറേറിയത്തില്‍ ഈര്‍പ്പം അധികം തങ്ങിനില്‍ക്കില്ല. ഉള്ളില്‍ ചൂടും കൂടുതലുണ്ടാകില്ല.
ചെടി നടുന്നതിന് മുമ്പ് കീടങ്ങളും അസുഖങ്ങളുമൊന്നും ഇല്ലെന്ന് ഉറപ്പുവരുത്തുക. അക്വേറിയത്തില്‍ ഉപയോഗിക്കുന്ന ഡ്രിഫ്റ്റ് വുഡ് ഉപയോഗിക്കാം. വെള്ളാരംകല്ലുകളും മാര്‍ബിള്‍ കഷണങ്ങളും രണ്ട് അടുക്കുകളായി ചില്ലുഭരണിയില്‍ നിരത്തിയും ടെറേറിയം തയ്യാറാക്കാം. ഇങ്ങനെ ചെയ്യുമ്പോള്‍ മരക്കരിയുടെ കഷണങ്ങള്‍ ഇതിന് മുകളില്‍ നിരത്തണം. ഈ മരക്കരിയുടെ മുകളില്‍ ചകിരിച്ചോറും മണലും മണ്ണിരക്കമ്പോസ്റ്റും കലര്‍ത്തിയ പോട്ടിങ്ങ് മിശ്രിതം നിറച്ച് ചെടി നടുന്ന രീതിയുമുണ്ട്.
അടച്ചു സൂക്ഷിക്കുന്ന ടെറേറിയത്തിലെ ഇലകളുടെ അറ്റം കരിഞ്ഞാല്‍ ചൂട് കൂടുതലാണെന്ന് മനസിലാക്കാം. ഇതിന്റെ അടപ്പ് ആഴ്ചയിലൊരിക്കല്‍ തുറന്ന് വായുസഞ്ചാരം നല്‍കണം. അതുപോലെ ചില്ലിന്റെ വശങ്ങളിലുള്ള ഈര്‍പ്പം പഞ്ഞി ഉപയോഗിച്ച് തുടച്ച് വൃത്തിയാക്കണം.
ടെറേറിയം തയ്യാറാക്കുന്ന വിധം
ടെറേറിയം നിര്‍മ്മിക്കാന്‍ ചില്ലുപാത്രം തന്നെ വേണമെന്നില്ല. പാത്രത്തിന്റെ അടിയില്‍ 1 മുതല്‍ 2.5 സെ.മീ ഉയരത്തില്‍ ചെറിയ കല്ലുകള്‍ ഇടുക. ഏകദേശം 55 മുതല്‍ 85 ഗ്രാം ചാര്‍ക്കോള്‍ യോജിപ്പിക്കുക. ഇത് ബ്ലോട്ടിങ്ങ് പേപ്പര്‍ അല്ലെങ്കില്‍ പത്രം ഉപയോഗിച്ച് മൂടിവെക്കുക. ഇതിലേക്ക് അഞ്ച് സെ.മീ ഉയരത്തില്‍ പോട്ടിങ്ങ് കമ്പോസ്റ്റ് നിറയ്ക്കുക. ഈ പോട്ടിങ്ങ് മിശ്രിതത്തിന്റെ 25 ശതമാനം അധികം ചകിരിച്ചോറ് ചേര്‍ക്കുക. എല്ലാം കൂടി അമര്‍ത്തിയ ശേഷം നനയ്ക്കുക. ഒരു ദിവസം ഇത് ഇങ്ങനെ തന്നെ വെക്കുക. അതിനുശേഷം മാത്രം ചെറിയ ചെടികള്‍ നടാം.
വളരെ പതുക്കെ വളരുന്ന ചെടികളാണ് ടെറേറിയത്തില്‍ വെക്കാന്‍ തെരഞ്ഞെടുക്കേണ്ടത്. ചെടികള്‍ അമിതമായി നനയ്ക്കരുത്. പെപ്പറോമിയ, ഫിറ്റോണി, ക്ലോറോഫൈറ്റം അഥവാ സ്‌പൈഡര്‍ പ്ലാന്റ്, ക്രിപ്റ്റാന്തസ്, പന്നല്‍ച്ചെടി, ആഫ്രിക്കന്‍ വയലറ്റ്, മൊസൈക്ക് ചെടി, ബെഗോണിയ, റിബ്ബണ്‍ ചെടി, ലക്കി ബാംബൂ, സക്കുലന്റ് ഇനങ്ങള്‍ എന്നിവയാണ് ടെറേറിയത്തിന് യോജിച്ച ചെടികള്‍.
Discussion about this post