നിത്യജീവിതത്തില് നമുക്ക് ഒഴിച്ചുകൂടാനാവാത്ത ഒന്നാണ് ചായയും കാപ്പിയും. മിക്കവര്ക്കും ഇതിലേതെങ്കിലും ഒന്നില്ലാതെ ദിവസം ആരംഭിക്കാന് തന്നെ കഴിയില്ല. കാപ്പി പ്രിയര്ക്ക് സുപരിചിതമായിരിക്കും ചിക്കറി എന്ന പേര്. യഥാര്ത്ഥത്തില് കാപ്പി പൊടിയില് ചേര്ക്കുന്ന ഒരു മായമാണ് ചിക്കറി. എന്നാല് ഇതിന് ദോഷഫലങ്ങളൊന്നും തന്നെയില്ല. ഫില്ട്ടര് കോഫിയില് ഏകദേശം മുപ്പത് ശതമാനത്തോളം ചിക്കറി അടങ്ങിയിട്ടുണ്ട്.
നീലപ്പൂക്കളുള്ള ബഹുവര്ഷിയായ ചെടിയില് നിന്നാണ് ചിക്കറി ലഭിക്കുന്നത്. കൂടുതല് പരിചരണമൊന്നും ഈ ചെടിക്ക് ആവശ്യമില്ല. സിച്ചോറിയം ഇന്റിബസ് എന്നാണ് ഇതിന്റെ ശാസ്ത്രനാമം.
യൂറോപ്യന് മേഖലകളില് കാലങ്ങളായി കൃഷി ചെയ്തു വരുന്ന ചിക്കറി സൂര്യകാന്തിയുടെ വര്ഗ്ഗത്തില്പെട്ട ഒരിനം സസ്യമാണ്. നെതര്ലാന്ഡ്, ബെല്ജിയം, ഫ്രാന്സ്, ജര്മ്മനി എന്നിവിടങ്ങളില് ആണിത് കൂടുതലും കൃഷി ചെയ്യുന്നത്. കൂടാതെ വടക്കേ അമേരിക്കയിലും കൃഷി ചെയുന്നു. ഇന്ത്യയില് വളരെ കുറച്ച് സംസ്ഥാനങ്ങളില് മാത്രമേ ചിക്കറി ഉത്പാദിപ്പിക്കുന്നുള്ളു. ഉത്തര്പ്രദേശ്, ഗുജറാത്ത് എന്നിവിടങ്ങളിലാണ് ചിക്കറി ഉത്പാദനത്തിന്റെ 97 ശതമാനവും ഉല്പ്പാദിപ്പിക്കുന്നത്.
കൃഷി രീതി
നല്ല സൂര്യപ്രകാശം ചിക്കറി കൃഷിക്ക് അത്യാവശ്യമാണ്. കൂടാതെ വെള്ളം കെട്ടി നില്ക്കാത്ത മണ്ണുമായിരിക്കണം. വിത്ത് മുളപ്പിക്കാനാവശ്യമായ അനുകൂലമായ താപനില 25 ഡിഗ്രി മുതല് 30 ഡിഗ്രി സെല്ഷ്യസ് വരെയാണ്. ഏറ്റവും കുറഞ്ഞ താപനിലയായി എട്ട് ഡിഗ്രിയും പരമാവധി താപനിലയായി 30 ഡിഗ്രിയുമുള്ള സ്ഥലത്തും ചിക്കറി വളര്ത്താം. ഇതിന്റെ വിത്തുകള് 9 ഇഞ്ച് മുതല് 1.5 അടി വരെ അകലത്തിലും 1.5 ഇഞ്ച് ആഴത്തിലുമാണ് വിതയ്ക്കുന്നത്. മുളയ്ക്കാനുള്ള കാലയളവ് രണ്ടു മുതല് നാല് ആഴ്ചയാണ്.
ഹൃദയാരോഗ്യത്തിന്, മുട്ടില് വരുന്ന തേയ്മാനത്തിന് ശമനം ഉണ്ടാവാന്, മാനസിക സംഘര്ഷം കുറയ്ക്കാന്, കരള് സംരക്ഷണം, പ്രമേഹം ചെറുക്കല്, എന്നിവയെല്ലാം ചിക്കറിയുടെ ഔഷധ ഗുണങ്ങളാണ്.
Discussion about this post