ചിതല്‍
മഴക്കാലം തെങ്ങിന്‍തൈയുടെ നടീല്‍ കാലവുമാണ്. തൈയെ ആക്രമിക്കുന്ന പ്രധാന വില്ലനാണ് ചിതല്‍. തെങ്ങിന്‍തൈ വയ്ക്കുമ്പോള്‍ ഒരുപിടി ഉലുവ ചതച്ച് പിള്ളക്കുഴിയില്‍ ഇട്ടാല്‍ ചിതല്‍ശല്യം ഒഴിവാക്കാം. തൈ നടുന്ന കുഴിയില്‍തന്നെ കറ്റാര്‍വാഴയും, മഞ്ഞളും ,
കൂവയും നടുന്നത് ചിതലിനെ പിടിച്ചുകെട്ടാനാണ്. തെങ്ങിന്‍തടത്തില്‍ കാഞ്ഞിരത്തിന്‍ ഇലയും കരിങ്ങോട്ടയിലയും ചേര്‍ത്ത് ചിതലിന്റെ ഉപദ്രവം കുറയ്ക്കാം. ചിതല്‍ശല്യം തീവ്രമായ സ്ഥലങ്ങളില്‍ തൈകളുടെ കടയ്ക്കലും ഓലപ്പട്ടകളിലും കശുവണ്ടിത്തോടില്‍നിന്നുമെടുക്കുന്ന എണ്ണ തേച്ചുപിടിപ്പിക്കുന്നത് നന്ന്.
ഉപ്പും മണലും തടത്തില്‍ വിതറുന്നത് ചിതലിനെ ചെറുക്കും.
വേപ്പിന്‍ പിണ്ണാക്കും ഉപ്പും സമം ചേര്‍ത്ത് തടത്തില്‍ ഇടുന്നത് ചിതലിനെ ചെറുക്കും.
തെങ്ങിന്‍ തോട്ടത്തില്‍ കറ്റാര്‍വാഴ നടുന്നത് ചിതലിനെ തുരത്തും.
ഇടക്കിടക്ക് തെങ്ങിന്‍ തോട്ടത്തില്‍ വൈക്കോലിട്ട് പുകക്കുന്നത് ചിതലുകളെ ചെറുക്കും.
വേപ്പ് – മഞ്ഞള്‍പ്പൊടി ലായനി
വേപ്പിന്റെ എണ്ണ എടുത്തതിനുശേഷം ലഭിക്കുന്ന പിണ്ണാക്ക്(വേപ്പിന്‍പിണ്ണാക്ക്) കുറച്ച് വെള്ളത്തില്‍ കുതിര്‍ക്കുക. നല്ലതുപോലെ കുതിര്‍ന്നതിനുശേഷം ഇതിലേക്ക് മഞ്ഞള്‍പ്പൊടി വെള്ളത്തില്‍ കലക്കിയത് ചെര്‍ത്ത് ഇളക്കി യോജിപ്പിക്കുക. ഈ മിശ്രിതം ചിതല്‍ കൂടുതലായി ഉള്ള സ്ഥലത്ത് ഒഴിച്ചാല്‍ ചിതലിന്റെ ശല്യം മാറാന്‍ സഹായിക്കും.
ചതച്ച ഉലുവ ,ഉപ്പ് ,ചാരം ഇവയൊക്കെ തെങ്ങിന്‍ തൈകള്‍ നടുമ്പോള്‍ ഇടുന്നത് ചിതല്‍ ശല്യം കുറയ്ക്കും.
എരുക്കിന്റെ ഇല തെങ്ങിന്‍ തടത്തില്‍ ഇടുന്നതും ചിതല്‍ ശല്യം കുറയ്ക്കും
തെങ്ങിന്‍ തൈകള്‍ നടുമ്പോള്‍ കുഴിയില്‍ കുറച്ച് കല്ലുപ്പ് വിതറുന്നതും ചിതലിനെ പ്രതിരോധിക്കുവാന്‍ സഹായിക്കും. ചിതല്‍ എന്നത് സസ്യങ്ങളുടെ ഒരു നിശബ്ദ കൊലയാളിയാണ്. ചിതലിന്റെ ആക്രമണങ്ങള്‍ നമ്മള്‍ മിക്കവാറും അറിയാറില്ല. ചിതല്‍ സസ്യങ്ങളുടെ വേരുകള്‍ മുഴുവന്‍ ആഹാരമാക്കി സസ്യങ്ങള്‍ നശിക്കുമ്പോള്‍ മാത്രമാണ് നമ്മള്‍ അറിയുക. അതുകൊണ്ട് ചിതലിനെതിരെ ആദ്യമേ മുതല്‍ ഒരു മുന്‍കരുതല്‍ അത്യാവശ്യമാണ്.
കൊമ്പന്‍ചെല്ലി
കൊമ്പന്‍ചെല്ലിയുടെ ഉപദ്രവം കുറയ്ക്കുന്നതിനായി ചെല്ലിപ്പുഴുക്കളെ വളക്കുഴിയില്‍ വച്ചുതന്നെ നശിപ്പിക്കുന്നതാണ് ഉത്തമം.വളക്കുഴിയില്‍ ഇടയ്ക്കിടയ്ക്ക് വേരടക്കം പിഴിതെടുത്ത പെരുവലം ചേര്‍ത്തുകൊടുക്കുന്നത് പുഴുക്കളുടെ വളര്‍ച്ചാദശകളില്‍ വൈകല്യമുണ്ടാക്കി ചെല്ലിശല്യം കുറയ്ക്കുന്നു. മഴക്കാലത്താണ് ചെല്ലിശല്യം കൂടുതലായി കാണുക. സന്ധ്യാസമയത്ത് തെങ്ങിന്റെ അവശിഷ്ടങ്ങളും മറ്റുമിട്ട് തീയിട്ടാല്‍ പ്രകാശം കണ്ട് എത്തുന്ന ചെല്ലി തീയില്‍വീണ് ചാകും. തെങ്ങിന്‍കവിളില്‍ കുമ്മായം, ചാരം, മണല്‍ മിശ്രിതം കലര്‍ത്തി ഇടുന്നത് കൊമ്പനോട് കൊമ്പുകോര്‍ക്കാനാണ്. ഉപ്പും ചാരവും മണലിനൊപ്പം ചേര്‍ത്ത് കവിളില്‍ ഇട്ടുകൊടുക്കുന്നത് ചെല്ലിയെ നിയന്ത്രിക്കുന്നതിനുള്ള മറ്റൊരു നമ്പര്‍. ചെന്നിനായകം കലക്കിയ വെള്ളം മണലില്‍ ചേര്‍ത്തുണക്കി ഓലക്കവിളില്‍ നിറയ്ക്കുന്നതും ഗുണംചെയ്യും. വേപ്പിന്‍പിണ്ണാക്കും മണലും ചേര്‍ത്ത് മഴ തുടങ്ങുന്നതോടെ കൂമ്പിനോടുചേര്‍ന്ന് മടലുകളില്‍ നിറയ്ക്കുന്നതും നാടന്‍ചെല്ലി നിയന്ത്രണമാര്‍ഗമാണ്.
ചെല്ലിയെ ആകര്‍ഷിക്കുന്നതിനുള്ള കെണികള്‍ വളരെ എളുപ്പത്തില്‍ തയ്യാറാക്കാം. രണ്ടുലിറ്റര്‍ കഞ്ഞിവെള്ളത്തില്‍ കാല്‍ കിലോഗ്രാം കടലപ്പിണ്ണാക്ക് ചേര്‍ത്ത് വാവട്ടമുള്ള മണ്‍പാത്രത്തില്‍ മൂടിക്കെട്ടിവയ്ക്കാം. ഒരാഴ്ചയ്ക്കുശേഷം ദുര്‍ഗന്ധം വമിക്കുന്ന മിശ്രിതത്തിന്റെ മൂടി തുറന്നാല്‍ ഒന്നാന്തരം ചെല്ലിക്കണിയാകും. ഒരുലിറ്റര്‍ കഞ്ഞിവെള്ളത്തില്‍ അഞ്ച് മരോട്ടിക്കായ ചതച്ചുവയ്ക്കുന്നതും ചെല്ലിക്കെണിതന്നെ.
വേരുതീനിപ്പുഴുക്കള്‍ മണല്‍മണ്ണില്‍ കൂടുതലായി കാണുന്നു,ഇടവിളയായി കൂവയും, ചണവും, മഞ്ഞളും നടുകയാണെങ്കില്‍ വേരുതീനിപ്പുഴുക്കള്‍ ആവഴിക്ക് വരില്ല.
മഞ്ഞള്‍
തെങ്ങിന്‍ തോപ്പില്‍ അത്യാവശ്യം വേണ്ട ഒരു വിളയാണ് മഞ്ഞള്‍.ചില കീടങ്ങളുടെ നിയന്ത്രണമാര്‍ഗ്ഗം എന്നതിലുപരി ഒരു അധികവരുമാനവും മഞ്ഞളില്‍ നിന്നും പ്രതീക്ഷിക്കാം.
ചെമ്പിന്‍ചെല്ലികള്‍
തെങ്ങിനെ കൊല്ലാന്‍ കഴിവുള്ളവയാണ് ചെമ്പിന്‍ചെല്ലികള്‍. പനങ്കള്ള് മണ്‍കലങ്ങളില്‍ ഒഴിച്ചുവച്ചാല്‍ ചെമ്പനുള്ള ആകര്‍ഷകെണികളായി. പുറന്തൊലിമാറ്റിയ പച്ചമടല്‍ കഷണങ്ങള്‍ കള്ളില്‍ മുക്കിവച്ചാലും ചെമ്പന്‍ചെല്ലിക്കുള്ള കെണിതന്നെ. ചെല്ലി കുത്തിയ ദ്വാരങ്ങള്‍ അടച്ചശേഷം ഏറ്റവും മുകളിലത്തെ ദ്വാരത്തിലൂടെ യൂക്കാലിപ്റ്റസ് എണ്ണയില്‍ കുതിര്‍ന്ന പഞ്ഞി തിരുകിവച്ച് തടിക്കകത്തെ ചെമ്പന്‍പുഴുക്കളെ നശിപ്പിക്കാം.
തയ്യാറാക്കിയത്
അനില്‍ മോനിപ്പിള്ളി
Discussion about this post