കുങ്കുമപ്പൂവ് അഥവാ സഫ്‌റോൺ‌ ഇത്രയും വില എന്തുകൊണ്ട്?  

വ്യത്യസ്തമായ സുഗന്ധവ്യജ്ഞനങ്ങൾ നമുക്ക് ചുറ്റുമുണ്ട്. അവയെല്ലാം താരതമ്യേന വിലയേറിയതുമാണ്. എന്നാൽ കുങ്കുമപ്പൂവ് അഥവാ സഫ്‌റോൺ എന്ന സുഗന്ധവ്യജ്ഞനം ഇവയിൽ ഭൂരിഭാഗത്തോടും താരതമ്യം ചെയ്യാൻ പോലുമാവാത്ത വിധം വിലപിടിപ്പുള്ളതാണ്. ഗുണനിലവാരമേറിയ ഒരു കിലോഗ്രാം കുങ്കുമപ്പൂവിന് 10,000 ഡോളർ വിലയുണ്ട്. അതായത് ഏഴ് ലക്ഷത്തോളം രൂപ. എന്തുകൊണ്ടാണ് കുങ്കുമപ്പൂവ് ഇത്രയും വിലപിടിപ്പുള്ള സുഗന്ധവ്യജ്ഞനമായത്?

ആയിരക്കണക്കിന് വർഷങ്ങൾക്ക് മുൻപു മുതലേ കുങ്കുമപ്പൂവ് പേരുകേട്ട ഒരു സുഗന്ധദ്രവ്യമാണ്. സുഗന്ധവ്യജ്ഞനമായും, മരുന്നായും ഒപ്പം നിറത്തിനും കാലാകാലങ്ങളായി കുങ്കുമപ്പൂവ് ഉപയോഗിച്ചുപോരുന്നു.

ക്രോക്കസ് സാറ്റിവസ് എന്ന ചെറു സസ്യത്തിന്റെ പൂവിനകത്ത് കാണുന്ന ചുവന്ന തന്തുകമാണ് സഫ്‌റോൺ. ഓരോ പുഷ്പ ത്തിലും 3 തന്തുക്കളാണുള്ളണ്.  കിഴങ്ങുകളിൽ നിന്നാണ് കുംകുമച്ചെടി വളരുന്നത്. ഏറിയത് ഒരു അടി മാത്രം ഉയരം വയ്ക്കും.

ഒരു ഗ്രാം സഫ്‌റോൺ ശേഖരിക്കുന്നതിനായി 150 പൂക്കളെങ്കിലും ആവശ്യമാണ്. ഒരു കിലോഗ്രാം ശേഖരിക്കണമെങ്കിൽ കുറഞ്ഞത് 150000 പൂക്കൾ വേണം.എന്നാൽ ഇവ ശേഖരിക്കുന്നതിനായി പ്രത്യേകം മെഷീനുകളൊന്നും ലഭ്യമല്ല. ഒരു വർഷത്തിൽ ഒരാഴ്ച കൊണ്ടാണ് കുങ്കുമപ്പൂക്കൾ വിടരുന്നത്.പൂക്കൾ വാടുന്നതിനു മുൻപ് തന്നെ ശ്രദ്ധാപൂർവ്വം ഇവ പറിച്ചെടുക്കണം. മറ്റു സുഗന്ധദ്രവ്യങ്ങൾ ഒരേക്കറിൽനിന്ന് നൂറുകണക്കിന് ക്വിന്റൽ വിളവ് തരുമ്പോൾ സഫ്രോൺ വെറും രണ്ട് കിലോയോളം മാത്രമാണ് ലഭിക്കുന്നത്.

ഇവയുടെ പരിപാലനം,  കാലാവസ്ഥ, മഴയുടെ ലഭ്യത എന്നിവയെ ആശ്രയിച്ചാണ് സഫ്രോണിന്റെ ഗുണനിലവാരം വ്യത്യസ്തപെടുന്നത്. വിളവെടുപ്പ് സമയം അടുക്കാറാകുമ്പോൾ മഴ ലഭിച്ചാൽ വലിയ പൂക്കൾ ലഭിക്കും. എന്നാൽ ഈ സമയത്ത് വരണ്ട കാലാവസ്ഥയാണെങ്കിൽ പൂക്കളുടെ വലിപ്പം കുറവായിരിക്കും.

ലോകത്തിലെതന്നെ ഏറ്റവും ഗുണനിലവാരമുള്ള സഫ്രോൺ വിടരുന്നത് കശ്മീരിലാണ്. കാലാവസ്ഥ വ്യതിയാനം മൂലം കശ്മീരിലടക്കം കുങ്കുമപ്പൂവിന്റെ  ഉൽപാദനം നന്നേ കുറഞ്ഞിട്ടുണ്ട്. ഒപ്പം കൃഷിയിടങ്ങൾ വാസസ്ഥലങ്ങളായി മാറുകയും ചെയ്യുന്നു. എന്നിരുന്നാലും ഓരോ വർഷവും കുങ്കുമപ്പൂവിന്റെ ഡിമാൻഡ് വർദ്ധിച്ചുവരികയാണ്. അപ്പോൾ പിന്നെ യഥാർത്ഥ കുങ്കുമപ്പൂവ് കുറഞ്ഞ വിലയിൽ എങ്ങനെ ലഭിക്കും?