ഇന്ന് ചിങ്ങം ഒന്ന് കർഷകദിനം. കർക്കിടകത്തിന്റെ വറുതിയിൽ നിന്ന് സമ്പൽസമൃദ്ധിയുടെ ദിവസങ്ങളിലേക്ക് കടക്കുന്ന പുതുവർഷം ആരംഭത്തിന് തുടക്കം കുറിക്കുന്ന സുദിനം. ഗൃഹാതുരത്വമേറുന്ന ഒത്തിരി ഓർമ്മകളുടെ വസന്ത കാലത്തേക്കാണ് ചിങ്ങ പുലരി നമ്മെ നയിക്കുന്നത്. കെടുതിയുടെയും വറുതിയുടെയും കാലത്തിൽ നിന്ന് പ്രതീക്ഷയുടെ കാലത്തിലേക്കുള്ള ചുവടുവെപ്പ് കൂടിയാണ് ഈ ദിനം. നമ്മുടെ കാർഷിക ഉത്സവമായ ഓണത്തെ വരവേൽക്കാൻ എല്ലാവരും തയ്യാറായി കഴിഞ്ഞിരിക്കുന്നു. അത്തം പിറക്കാൻ ഇനി അധികനാൾ ഇല്ല. വീട്ടുമുറ്റത്ത് വിവിധ നിറഭേദങ്ങളിൽ ഇനി പൂക്കൾ കളം വരയ്ക്കും. രാമായണ ശീലുകളുടെ ഈരടികളിൽ നിന്ന് മലയാളി മങ്കമാരുടെ തിരുവാതിര പാട്ടിൻറെ അലയൊലികൾ ചുറ്റും മുഴങ്ങും. തുമ്പിതുള്ളലും പുലിക്കളിയും വള്ളംകളിയുമായി നാടാകെ ആഘോഷ ആരവങ്ങൾ ഉയരും.
പുതുവർഷാരംഭത്തിന്റെ നാന്ദി കുറിക്കുന്ന ഈ ദിനം കർഷക ദിനം കൂടിയാണ്. മണ്ണിൽ പൊന്നുവിളയിക്കുന്ന കർഷകൻറെ മഹത്വത്തെ ഓർമ്മപ്പെടുത്തുന്ന സുദിനം. നമ്മുടെ നാടിൻറെ നട്ടെല്ലാണ് കർഷകർ. രാജ്യത്തിൻറെ സമഗ്ര വളർച്ചയിൽ ഏറെ പ്രധാനപ്പെട്ടതാണ് കാർഷികമേഖല. എന്നാൽ പ്രകൃതിയുടെ ഭാവമാറ്റവും, മഹാമാരിയുടെ കടന്നുവരവും ഈ മേഖലയിലും കാര്യമായ ചലനങ്ങൾ സൃഷ്ടിച്ചു. അതിജീവനത്തിന്റെ പാതയിലാണ് ഇപ്പോഴും കാർഷിക മേഖല. ഓണവിപണി ലക്ഷ്യമിട്ട് കൃഷി ചെയ്യാൻ ആരംഭിച്ച പലർക്കും പറയാനുള്ളത് നഷ്ടങ്ങളുടെ കണക്കുകളാണ്. വിളനാശം സംഭവിക്കുന്ന കർഷകർക്ക് പലപ്പോഴും സഹായഹസ്തങ്ങൾ ഉയരാത്തതും, അവരുടെ ദുഃഖങ്ങൾ കടലാസുകളിൽ ഒതുങ്ങി പോകുന്നതും തിരാവേദന തന്നെയാണ്. എത്രതന്നെ ദുരന്തക്കയത്തിലാണെങ്കിലും കർഷകർ പിന്നെയും പ്രകൃതിയോടും മണ്ണിനോടും മല്ലിട്ടു വിജയം വരിക്കാൻ ഒരുങ്ങുന്നു. കാരണം മണ്ണിലാണ് അവരുടെ ജീവനും ജീവിതവും. ഉഴുതുണ്ണുന്നവനെ തൊഴുതുണ്ണുവാൻ ഈ സമൂഹം പഠിക്കണം . കർഷകർക്ക് അവർ ആഗ്രഹിക്കുന്ന പരിഗണന തന്നെ ലഭ്യമാക്കണം. ഈ ദിനം കർഷക കരിദിനമായല്ല ആചരിക്കപ്പെടേണ്ടത്. മറിച്ച് നമ്മുടെ കാർഷിക സംസ്കൃതിയെ തിരികെ കൊണ്ടുവരുന്ന പ്രവർത്തനങ്ങൾക്ക് നാന്ദി കുറിക്കുന്ന ദിവസമായാണ് മാറേണ്ടത്.
Discussion about this post