നമ്മുടെ നാട്ടില്‍ നന്നായി വളര്‍ന്ന് കായ്ഫലങ്ങൾ നൽകുന്ന ഒന്നാണ് ബബ്ലൂസ് നാരകം. പണ്ട് വീട്ടുമുറ്റങ്ങളിലും വളപ്പുകളിലും നട്ടുപിടിച്ചിരുതാണ് ഈ വൃക്ഷം. പക്ഷേ പിന്നീട് ഇതന്യമായിമാറിയിരുന്നു. ഇപ്പോൾ ഇത് പൂര്‍വാധികം ശക്തിയോടെ തിരിച്ചു വന്നു തുടങ്ങിയിട്ടുണ്ട്.
മാതളനാരങ്ങ, അല്ലി നാരങ്ങ, കമ്പിളി നാരകം തുടങ്ങിയ പേരുകളിലും ഇത് അറിയപ്പെടുന്നുണ്ട്. മരമായി വളരുന്നതിനാൽ മുറ്റത്ത് തണലിനായും ഇത് വളർത്താവുന്നതാണ്. കായ്കൾ ഉണ്ടായി ആറു മാസത്തിനകമാണ് ബബ്ലൂസ് നാരകത്തിന്റെ വിളവെടുപ്പ് നടത്തുന്നത്.
മേയ്, ജൂൺ മാസങ്ങളിൽ പൂക്കളായി മാറുന്ന ഇവ വൈകാതെ കായ്ക്കും. നവംബർ, ഡിസംബറിലാണ് വിളവെടുപ്പ് നടത്തുക. വിത്തുകൾ മുളപ്പിച്ചും എയർ ലെയറിങ്, ഗ്രാഫ്റ്റിങ്, ബഡ്ഡിങ് രീതിയിലും തൈകൾ ഉൽപാദിപ്പിച്ച് നടാവുന്നതാണ്. ബഡ് ചെയ്ത തൈകൾ അധികം ഉയരംവെക്കാതെ തന്നെ ഫലം തരും. ഇടക്ക് കോതി വിട്ടാൽ പുതിയ ശിഖരങ്ങൾ വളർന്ന് പഴങ്ങൾ ധാരാളമുണ്ടാകാനും തുടങ്ങും. ജൈവവളങ്ങൾ ഇടക്ക് നൽകിയാൽ വിളവ് വർധിപ്പിക്കാനാകും.
നാരകത്തിന്റെ കുടുംബത്തിലെ ഏറ്റവും വലിപ്പമുള്ള ഫലം ഇവയുടേതാണ്. മധുരമുള്ള അല്ലികളുള്ള ഇതിന്റെ ഫലം വെള്ള/ചുവപ്പ് നിറങ്ങളിലാണ് സാധാരണയായി കണ്ടുവരുന്നത്. ഉള്ളിലെ കാമ്പിനുമേലെയായി പുറം ആവരണവും ഇവയ്ക്കുണ്ട്. സ്‌പോഞ്ച് പോലെയുള്ള തോടിന്റെ ഉൾഭാഗമാണ് ഇവയുടെ പ്രേത്യേകത. വായുവിൽ പതി വെച്ചും ഗ്രാഫ്റ്റ് ചെയ്തും, മുകുളനം വഴിയും ഇവയുടെ പുതിയ തൈകൾ ഉത്പാദിപ്പിക്കാവുന്നതാണ്.
വലിയ പരിചരണമില്ലാതെ വർഷംതോറും ഫലം ലഭിക്കുമെന്നതും ഇവയുടെ സവിശേഷതയാണ്. വേനൽക്കാലങ്ങളിൽ ആവശ്യത്തിന് നനക്കണമെന്ന് മാത്രം. അല്ലെങ്കിൽ ശിഖരങ്ങൾക്ക് ഉണക്കം ബാധിക്കാൻ സാധ്യതയുണ്ട്. പല രീതിയിൽ ഉൽപാദിപ്പിച്ച തൈകൾ നഴ്സറികളില്‍ ലഭ്യമാണ്.
Discussion about this post