തണ്ണിമത്തന് കൃഷി എന്ന് കേള്‍ക്കുമ്പോള്‍ എന്തോ വലിയ കാര്യം ചെയ്യുന്നത് പോലെ നമുക്ക് തോന്നും. പക്ഷേ ഏറ്റവും എളുപ്പം ചെയ്യാന്‍ കഴിയുന്നതും ധാരാളം ഫലം ലഭിക്കുന്നതുമായ കൃഷിയാണ് തണ്ണിമത്തന് കൃഷി എന്നത് നമുക്ക് പലര്‍ക്കും അറിയില്ല. നമ്മുടെ കാലാവസ്ഥക്ക് വളരെ അനുയോജ്യവുമായ ഒന്നാണ് തണ്ണിമത്തന്. കേരളത്തില്‍ സാധാരണയായി ഡിസംബര്‍ മുതല്‍ മാര്‍ച്ച് വരെയുള്ള സമയത്താണ് ഇത് തണ്ണിമത്തന് കൃഷി ചെയ്യുന്നത്.
സൂര്യപ്രകാശം ധാരാളമായി ലഭിക്കുന്ന തുറസ്സായ സ്ഥലമാണ് ഈ കൃഷിക്കായി തിരഞ്ഞെടുക്കേണ്ടത്. അന്തരീക്ഷത്തിലെ ഈര്‍പ്പവും മഴയും കുറഞ്ഞ വരണ്ട കാലാവസ്ഥയുമാണ് തണ്ണിമത്തന്റെ വളര്‍ച്ചയ്ക്ക് ഏറെ അനുയോജ്യം. കായ്കള്‍ ഉണ്ടാകുന്ന സമയത്തുള്ള മഴ തണ്ണിമത്തന്റെ ഗുണവും മധുരവും കുറയാന്‍ ഇടയാക്കിയെക്കും. നന്നായി വിളഞ്ഞു പഴുത്ത കായ്കളില്‍ നിന്നെടുത്ത വിത്ത് നടാന്‍ പ്രേത്യേകം ശ്രദ്ധിക്കണം.
വിത്തിട്ട് ഒരാഴ്ചക്കകം തൈ വളരും. ഏകദേശം മൂന്ന് ആഴ്ച കഴിയുമ്പോള്‍ ഇലകളൊക്കെ നന്നായി വളർന്നിട്ടുണ്ടാകും. ചെടിക്ക്‌ മൂന്നോ നാലോ ഇല വരുമ്പോൾ ഓരോ തടത്തിലും കടലപ്പിണ്ണാക്ക്‌, മണ്ണിരവളം എന്നിവ ചേർത്തുകൊടുക്കണം. വിത്തിട്ട് 35 മുതൽ 45 ദിവസങ്ങള്‍ക്കുളളിലാണ് പെണ്‍പൂക്കള്‍ വിരിഞ്ഞു തുടങ്ങുക. ആദ്യം വിരിയുക ആൺപൂക്കളാണ്‌. പക്ഷേ അവ പെട്ടെന്നുതന്നെ കൊഴിഞ്ഞുവീഴും.വൈകാതെ ഒരാഴ്‌ചയ്‌ക്കകം പെൺപ്പൂക്കൾ വിരിയും. 
ചെടി പടർന്നുവളരാൻ തുടങ്ങുമ്പോള്‍ മണ്ണില്‍ തെങ്ങോലകളോ ചുള്ളികളോ ഇട്ടുകൊടുക്കണം. ഭൂമിയുടെ ചൂട്‌ തണ്ണിമത്തൻ വള്ളികൾക്ക്‌ നേരിട്ട് ബാധിക്കാതിരിക്കാൻ ഇതു സഹായിക്കും. തുടക്കത്തില്‍ രണ്ടോ മൂന്നോ ദിവസത്തിലൊരിക്കല്‍ നനച്ചുകൊടുക്കണം. കായ്പിടുത്തം തുടങ്ങുമ്പോള്‍ മണ്ണിന്‍റെ നനവനുസരിച്ച് ജലസേചനം കുറക്കാം. മണ്ണില്‍ ഈര്‍പ്പം കൂടിയാല്‍ അത് കായപൊട്ടലിനും മധുരം കുറയുന്നതിനും ഇടയാക്കും.
നമ്മുടെ നാട്ടില്‍ താരതമേന്യന തണ്ണിമത്തന് കീടങ്ങളും രോഗങ്ങളും കുറവാണ്. എന്നാല്‍ വെളളരിവര്‍ഗ്ഗ വിളകളെ ആക്രമിക്കുന്ന മത്തന്‍ വണ്ട്, കായീച്ച എന്നിവയെ സൂക്ഷിക്കേണ്ടതുമുണ്ട്.
വിളവെടുപ്പിനു 15 ദിവസം മുമ്പ് ജലസേചനം നിർത്തണം. 90-120 ദിവസങ്ങളാണ് വിളയുടെ ശരാശരി ദൈര്‍ഘ്യം. ക്യത്യസമയത്തുളള വിളവെടുപ്പ് ഗുണമേന്‍മയുളള കായ്കള്‍ നല്‍കും. വിരല്‍ കൊണ്ടു തട്ടുമ്പോൾ . നന്നായി വിളഞ്ഞ കായ്കളില്‍ പതുപതത്ത ശബ്ദം കേള്‍ക്കാം.
Discussion about this post