വയനാട് ഇനി സമ്പൂർണ പച്ചത്തുരുത്ത്

സംസ്ഥാനത്തെ രണ്ടാമത്തെ സമ്പൂർണ പച്ചത്തുരുത്ത് ജില്ലയായി വയനാട്. അതി ജീവനത്തിന്റെ ജൈവവൈവിധ്യ ങ്ങൾ എന്ന ലക്ഷ്യത്തോടെ ഹരിത കേരളമിഷന്റെ നേതൃത്വത്തിൽ ആരംഭിച്ച പച്ചത്തുരുത്ത് പദ്ധതിയിലൂടെയാണ് ജില്ലയ്ക്ക് ഇൗ നേട്ടം സ്വന്തമായത്.

തദ്ദേശ സ്വയംഭരണ സ്ഥാപനങ്ങൾ, സന്നദ്ധ സംഘടനകൾ, പൊതുമേഖല സ്ഥാപനങ്ങൾ, വകുപ്പുകൾ, വ്യക്തികൾ തുടങ്ങിയവയുടെ നേതൃത്വത്തില്‍  സ്ഥലങ്ങള്‍ കണ്ടെത്തുന്നു. തുടർന്ന് ആ സ്ഥലത്ത് ഇവരുടെ സഹായത്തോടെ തദേശീയമായ വൃക്ഷങ്ങളും മറ്റ് സസ്യങ്ങളും ഉള്‍പ്പെടുത്തി മനുഷ്യ നിര്‍മ്മിത ചെറുവനങ്ങള്‍ സൃഷ്ടിക്കുക. ഇതാണ് പച്ചത്തുരുത്ത് കൊണ്ട് ലക്ഷ്യമിടുന്നത്.

തദ്ദേശ സ്ഥാപനങ്ങളില്‍ തൊഴിലുറപ്പ് പദ്ധതിയുടെ സഹായത്തോടെയാണ് ആശയം നടപ്പിലാക്കുന്നത്. കൂടാതെ പദ്ധതിക്ക് ആക്ഷന്‍ പ്ലാനില്‍ ഉള്‍പ്പെടുത്തി മൂന്ന് മുതല്‍ അഞ്ച് വര്‍ഷം വരെ പരിപാലനവും ഉറപ്പ് വരുത്തുന്നുണ്ട്.

വയനാട് ജില്ലയില്‍ 26 തദ്ദേശ സ്ഥാപനങ്ങളില്‍ നിന്നായി 18.66 ഏക്കറില്‍ 33 പച്ചത്തുരുത്തുകള്‍ ഇതിനോടകം സൃഷ്ടിച്ചു കഴിഞ്ഞു. ആകെ 11609 തൈകളാണ് നട്ടിട്ടുള്ളത്. അതിൽ 463 വള്ളിച്ചെടികളും 94 കുറ്റിച്ചെടികളുമാണ് ഉള്ളത്.

പച്ചത്തുരുത്തുകൾക്കായി മുള, ചെമ്പരത്തി, ചീമക്കൊന്ന തുടങ്ങിയ ചെടികള്‍ കൊണ്ട് അനുയോജ്യമായ ജൈവ വേലിയും ഒപ്പം തിരിച്ചറിയാന്‍ പാകത്തിൽ ബോര്‍ഡും സ്ഥാപിച്ചിട്ടുണ്ട്.
നെന്‍മേനി ഗ്രാമപഞ്ചായത്തിലാണ് ജില്ലയില്‍ ഏറ്റവും കൂടുതല്‍ പച്ചത്തുരുത്തുകളായ 4 എണ്ണം ഉള്ളത്.

പച്ചത്തുരുത്ത് പദ്ധതിയിലൂടെ പാപ്ലശ്ശേരി വെള്ളിമല ഉമാമഹേശ്വര ക്ഷേത്രത്തില്‍ ഒരു മനുഷ്യനിര്‍മിത കാവ് കൂടി ഒരുക്കാൻ തുടങ്ങുകയാണ് പൂതാടി ഗ്രാമപഞ്ചാത്ത്. അന്യം നിന്നുകൊണ്ടിരിക്കുന്ന കമ്പകം, കരിഞ്ഞൊട്ട, നെയ്ത്താലി , ഇടിഞ്ഞില്‍, മലയശോകം മുതലായ വൈവിധ്യങ്ങളായ വൃക്ഷങ്ങള്‍ ഇവിടെ സംരക്ഷിക്കാൻ ഇത് വഴി സാധിക്കും.

2019 ല്‍ നട്ട 10,134 തൈകളില്‍ ഈ പ്രാവശ്യം റീപ്ലാന്റിംഗ് ചെയ്തത് 1417 എണ്ണം മാത്രമാണ്. 1475 തൈകള്‍ ഇക്കുറി നട്ടിട്ടുണ്ട്.

വയനാടിന്റെ പ്രാദേശിക സാഹചര്യത്തിനിണങ്ങിയ തൈകള്‍ കൂടുതലായി നട്ടുപിടിപ്പിച്ച് ജില്ലയില്‍ കുറഞ്ഞത് 50 പച്ചത്തുരുത്ത് എങ്കിലും വളർത്തുക എന്നതാണ് ഹരിത കേരളം ജില്ലാ മിഷന്റെ ലക്ഷ്യം.