തളരാത്ത നിശ്ചയദാർഢ്യം, ശാസ്ത്രീയമായ ചുവടുവെപ്പ്:  കൃഷിയിൽ വിജയം കൊയ്ത് അരുൺ

ഐ.ടി.ഐ പഠനത്തിന് ശേഷം ലഭിച്ച സ്ഥിരവരുമാനമുള്ള ജോലി ഉപേക്ഷിച്ച് മണ്ണിലിറങ്ങാൻ ഒരു 22 വയസ്സുകാരൻ തീരുമാനിക്കുമ്പോൾ ചുറ്റുമുള്ളവർ നെറ്റി ചുളിച്ചു. “കൃഷി നഷ്ടക്കച്ചവടമാണ്, സ്ഥിരതയില്ലാത്ത മേഖലയാണ്” എന്ന ഉപദേശങ്ങൾക്കും പരിഹാസങ്ങൾക്കും മുന്നിൽ അരുൺ എസ്. നായർ എന്ന മല്ലപ്പള്ളിക്കാരൻ യുവാവ് പതറിയില്ല. കർഷകനാകാൻ അരുൺ തീരുമാനിക്കുമ്പോൾ അത് വെറുമൊരു വാശിയായിരുന്നില്ല, മറിച്ച് മണ്ണിനോടും കൃഷിയോടുമുള്ള അടങ്ങാത്ത പ്രണയമായിരുന്നു. എന്നാൽ ഈ യാത്ര അരുണിന് മുന്നിൽ വിരിച്ച പാത പൂമെത്തയായിരുന്നില്ല. കല്ലും മുള്ളും നിറഞ്ഞ ആ പാതയിലൂടെ സഞ്ചരിച്ച് ഇന്ന് വിജയത്തിന്റെ കൊടുമുടിയിൽ നിൽക്കുമ്പോൾ അരുണിന് പറയാനുള്ളത് പോരാട്ടത്തിന്റെയും അതിജീവനത്തിന്റെയും കഥയാണ്.തോൽവികളിൽ നിന്ന് പാഠം ഉൾക്കൊണ്ട് നൂതന കൃഷിരീതികളിലൂടെ ലക്ഷങ്ങളുടെ വരുമാനം നേടുന്ന മാതൃകാ കർഷകനായ . അരുൺ ഇന്ന് നാടിന് അഭിമാനമാണ്

പരാജയങ്ങൾ നൽകിയ പാഠങ്ങൾ

രണ്ട് വർഷം ഒരു സ്ഥാപനത്തിൽ ഇലക്ട്രീഷ്യനായി ജോലി ചെയ്യുമ്പോഴും അരുണിന്റെ മനസ്സ് മുഴുവൻ കൃഷിയിടങ്ങളിലായിരുന്നു. ജോലി ഉപേക്ഷിക്കാനുള്ള തീരുമാനം അറിയിച്ചപ്പോൾ ചുറ്റുമുള്ളവരിൽ നിന്ന് ഉയർന്നത് പരിഹാസങ്ങളും ഉപദേശങ്ങളുമായിരുന്നു. “സ്ഥിര വരുമാനമുള്ള ജോലി കളഞ്ഞ് അനിശ്ചിതത്വങ്ങൾ നിറഞ്ഞ കൃഷിയിലേക്ക് എന്തിനാണ് ഇറങ്ങുന്നത്?” എന്ന ചോദ്യം അരുണിന് ആവർത്തിച്ച് കേൾക്കേണ്ടി വന്നു. എന്നാൽ തന്റെ സ്വപ്നങ്ങൾക്ക് ചിറകുനൽകാൻ കുടുംബം കൂടെ നിന്നതോടെ അരുൺ ആത്മവിശ്വാസത്തോടെ മണ്ണിലിറങ്ങി. വീടിനടുത്തുള്ള സ്ഥലം പാട്ടത്തിനെടുത്ത് ഒരേക്കറിൽ കപ്പ കൃഷി ചെയ്താണ് തുടക്കമിട്ടത്. എന്നാൽ പ്രകൃതി ആ കന്നിക്കൃഷിയെ ചതിച്ചു. രൂക്ഷമായ പന്നി ശല്യവും  അപ്രതീക്ഷിതമായി എത്തിയ കനത്ത മഴയും വിലയിടിവും  അരുണിന്റെ സ്വപ്നങ്ങളെ പാതിവഴിയിൽ തകർത്തു. കപ്പക്കൃഷിയിൽ നിന്നുണ്ടായ കനത്ത നഷ്ടം അരുണിനെ തളർത്തുമെന്ന് കരുതിയവർക്ക് തെറ്റി. പരാജയങ്ങളിൽ നിന്ന് പാഠം ഉൾക്കൊണ്ട് അദ്ദേഹം വാഴക്കൃഷിയിലേക്ക് തിരിഞ്ഞു. പക്ഷേ, ശാസ്ത്രീയമായ കൃഷി അറിവുകളുടെ കുറവും വിപണനത്തിലെ പോരായ്മകളും അവിടെയും അരുണിനെ നഷ്ടത്തിന്റെ പടുകുഴിയിലേക്ക് തള്ളിവിട്ടു. പലരും പിന്തിരിയാൻ പറഞ്ഞിട്ടും അരുൺ തന്റെ പരീക്ഷണങ്ങൾ തുടർന്നു.

യൂട്യൂബ് പരീക്ഷണവും പഠിച്ച പാഠങ്ങളും

ഇത്തവണ യൂട്യൂബിനെ ഗുരുവാക്കി തണ്ണിമത്തൻ കൃഷിയിലേക്കാണ് അദ്ദേഹം ഇറങ്ങിയത്. എന്നാൽ കൃത്യമായ മണ്ണറിവോ വളപ്രയോഗമോ ഇല്ലാതെ നടത്തിയ ആ പരീക്ഷണവും പരാജയപ്പെട്ടു. വിത്തിനങ്ങളുടെ തിരഞ്ഞെടുപ്പും, അശാസ്ത്രീയ വളപ്രയോഗം  കാലാവസ്ഥാ വ്യതിയാനം തുടങ്ങി തൊട്ടതെല്ലാം പിഴക്കുന്ന അവസ്ഥ  ഇത്  അരുണിന്റെ ആത്മവിശ്വാസം തകർക്കാൻ പര്യാപ്തമായിരുന്നു. പക്ഷേ, അവിടെയാണ് അരുൺ എന്ന കർഷകൻ വ്യത്യസ്തനായത് തോറ്റ് പിൻമാറുന്നതിന് അരുൺ ഒരുക്കമായിരുന്നില്ല പകരം  തന്റെ പരാജയ കാരണങ്ങൾ അദ്ദേഹം ഓരോന്നായി വിശകലനം ചെയ്തു. കൃഷി ഒരു ഭാഗ്യപരീക്ഷണമല്ല, മറിച്ച് കൃത്യമായ ശാസ്ത്രീയ അടിത്തറയുള്ള ബിസിനസ്സാണെന്ന് അദ്ദേഹം തിരിച്ചറിഞ്ഞു.

ശാസ്ത്രീയ കൃഷിയിലേക്ക് ഒരു ചുവടുവെപ്പ്

പരാജയങ്ങളിൽ നിന്ന് കരകയറാൻ അരുൺ ആദ്യം ചെയ്തത് മല്ലപ്പള്ളി കൃഷി ഭവനുമായി ബന്ധപ്പെടുക എന്നതായിരുന്നു. കൃഷി ഓഫീസർ ശ്രീമതി അഞ്ജുവിന്റെയും അസിസ്റ്റന്റ് കൃഷി ഓഫീസർ ശ്രീ ബൈജുവിന്റെയും മാർഗനിർദേശങ്ങൾ അരുണിന് പുതിയ ദിശാബോധം നൽകി. കൃഷിവകുപ്പ് നടത്തിയ പരിശീലന പരിപാടികളിൽ പങ്കെടുത്തും മറ്റ് മാതൃകാ കർഷകരുടെ തോട്ടങ്ങൾ സന്ദർശിച്ചും അരുൺ പ്രായോഗിക ജ്ഞാനം നേടി. പരീക്ഷണാടിസ്ഥാനത്തിൽ ചെയ്ത പയർ, പാവൽ, വെണ്ട കൃഷികൾ മികച്ച വിളവ് നൽകിയതോടെ അരുണിന്റെ ആത്മവിശ്വാസം വർദ്ധിച്ചു

ഫ്രഷ് നേച്ചർ ഫാം പ്രോഡക്റ്റ്’: വിപണനത്തിലെ വിപ്ലവം

വിളവ് നന്നായുണ്ടായാലും ഇടനിലക്കാർ ലാഭം കൊണ്ടുപോകുന്ന അവസ്ഥയായിരുന്നു അടുത്ത പ്രതിസന്ധി. ഇതിനെ മറികടക്കാൻ ‘ബ്രാൻഡിംഗ്’ എന്ന ആശയത്തിലേക്ക് അരുൺ എത്തി. ‘ഫ്രഷ് നേച്ചർ ഫാം പ്രോഡക്റ്റ്’ എന്ന പേരിൽ സ്വന്തമായി ഒരു ബ്രാൻഡ് രൂപീകരിച്ചു. അച്ഛനും അമ്മയും അനിയത്തിയും സുഹൃത്തുക്കളും അരുണിന് താങ്ങായി നിന്നു. തന്റെ കൃഷി യിടത്തിനടുത്തുള്ള  പാതയോരത്തെ സ്വന്തമായി ഔട്ട്‌ലെറ്റ്  ആരംഭിച്ചും മല്ലപ്പള്ളി ടൗണിൽ നേരിട്ട് എത്തിച്ചു വാഹനങ്ങളിൽ വച്ച്   ഇടനിലക്കാരെ ഒഴിവാക്കി വിപണനം ചെയ്തു  കൃഷിയിടത്തിൽ നിന്ന് നേരിട്ട് ഉപഭോക്താവിലേക്ക് എന്ന രീതി സ്വീകരിച്ചതോടെ ന്യായമായ വില അരുണിന്  ലഭിച്ചു തുടങ്ങി.

വൈവിധ്യവൽക്കരണത്തിലൂടെ വർഷം മുഴുവൻ വരുമാനം

അരുണിന്റെ വിജയത്തിന്റെ ഏറ്റവും പ്രധാനപ്പെട്ട വശങ്ങളിലൊന്ന് അദ്ദേഹം കൃഷിയിൽ പുലർത്തുന്ന വൈവിധ്യവൽക്കരണമാണ്. ഒരു വലിയ ഭൂപ്രദേശത്ത് ഒരേ വിള മാത്രം കൃഷി ചെയ്യുന്ന പഴയ രീതിക്ക് പകരം, വിപണിയിലെ ഡിമാൻഡും കാലാവസ്ഥാ വ്യതിയാനങ്ങളും മുൻകൂട്ടി കണ്ടുകൊണ്ട് ഒരേസമയം ഒന്നിലധികം വിളകൾ കൃഷി ചെയ്യുന്ന രീതിയാണ് അരുൺ പിന്തുടരുന്നത്. പയർ, പാവൽ, വെണ്ട, പടവലം തുടങ്ങി നിത്യേന വിപണിയിൽ ആവശ്യമുള്ള പച്ചക്കറികൾക്കൊപ്പം തണ്ണിമത്തൻ പോലുള്ള സീസണൽ വിളകളും അദ്ദേഹം കൃത്യമായ ഇടവേളകളിൽ കൃഷി ചെയ്യുന്നു. വർഷം മുഴുവൻ തന്റെ കാർഷിക ഉൽപ്പന്നങ്ങൾ വിപണിയിലെത്തിക്കുന്നതിലൂടെ വിപണിയിലെ തന്റെ സാന്നിധ്യവും വിശ്വാസ്യതയും നിലനിർത്താൻ അരുണിന് സാധിക്കുന്നു. സാമ്പത്തിക ഭദ്രത ഉറപ്പാക്കുന്നതിലും ഈ രീതിക്ക് വലിയ പങ്കുണ്ട്. ഏതെങ്കിലും ഒരു പ്രത്യേക വിളയ്ക്ക് വിപണിയിൽ വിലയിടിവ് സംഭവിക്കുകയോ അല്ലെങ്കിൽ കാലാവസ്ഥാ വ്യതിയാനം മൂലം ഒരു കൃഷിക്ക് നാശം സംഭവിക്കുകയോ ചെയ്താലും, മറ്റ് വിളകളിൽ നിന്നുള്ള വരുമാനം അരുണിനെ സാമ്പത്തികമായി സംരക്ഷിക്കുന്നു. നഷ്ടസാധ്യതകളെ വിഭജിച്ചു നൽകുന്ന ഈ ‘റിസ്ക് മാനേജ്മെന്റ്’ രീതിയാണ് അരുണിനെ മറ്റ് കർഷകരിൽ നിന്ന് വ്യത്യസ്തനാക്കുന്നത്.

ഹൈടെക് തണ്ണിമത്തൻ കൃഷി: വിജയരഹസ്യം

2026 ഡിസംബറിലാണ് അരുൺ തന്റെ ഏറ്റവും വലിയ വെല്ലുവിളിയായിരുന്ന തണ്ണിമത്തൻ കൃഷിയിലേക്ക് വീണ്ടും ഇറങ്ങുന്നത്. ഇത്തവണ 70 സെന്റ് പാടത്ത് തികച്ചും ശാസ്ത്രീയമായ ‘ഹൈടെക്’ രീതിയാണ് അവലംബിച്ചത്.’സൂപ്പർ ക്വീൻ’ എന്ന അത്യുൽപ്പാദന ശേഷിയുള്ള വിത്തിനം തിരഞ്ഞെടുത്ത അരുൺ, മണ്ണൊരുക്കുന്ന ഘട്ടം മുതൽ കൃത്യത പാലിച്ചു. നിലം ഒരുക്കുമ്പോൾ തന്നെ pH ക്രമീകരിക്കാൻ കുമ്മായം ചേർക്കുകയും, അടിവളമായി ജൈവ വളങ്ങൾ നൽകുകയും ചെയ്തു. മൾച്ചിങ് ഷീറ്റും തുള്ളിനന സംവിധാനവും (Drip Irrigation) വഴി ജലവും വളവും നേരിട്ട് വേരുകളിലേക്ക് എത്തിച്ചും. ചെടികളുടെ വളർച്ച കാലയളവിനെ 3 ഘട്ടങ്ങളായി തിരിച്ചു  തുടർന്ന് ഓരോ ഘട്ടത്തിനും അനുസൃതമായി 10 ദിവസത്തെ ഇടവേളകളിൽ ചെടികൾക്കാവശ്യമായ രീതിയിലുള്ള ശാസ്ത്രീയ വളപ്രയോഗവും ആണ് പിന്തുടർന്ന് പോന്നത് . ആദ്യ  ഘട്ടത്തിൽ  വേരുകളുടെ  വളർച്ചക്കും വള്ളികൾ വേഗത്തിൽ പടരാനും  പ്രാധാന്യം നൽകിയും, രണ്ടാം ഘട്ടത്തിൽ പൂക്കൾ വർധിക്കാനും  കായ്കൾ പിടിക്കാനും  ആവശ്യമായ  വളങ്ങൾ  നൽകിയും മൂനാം ഘട്ടത്തിൽ കായ യുടെ വലിപ്പവും ഭാരവും വർധിപ്പിക്കുന്നതിനുമുള്ള വളങ്ങൾ നൽകിയും  അദ്ദേഹം കൃഷിയിടത്തെ പരിപാലിച്ചു.

ലാഭക്കണക്കുകൾ

മൂന്ന് മാസത്തോളം നീണ്ടുനിൽക്കുന്ന കൃഷി കാലയളവിൽ  7000 കിലോയോളം  തണ്ണിമത്തനുകളാണ്. അരുണിന് ലഭിച്ചത്  കിലോയ്ക്ക് 35 രൂപ നിരക്കിൽ നേരിട്ട് വിറ്റഴിച്ചതിലൂടെ 2,45,000 രൂപയുടെ വിറ്റുവരവ് അരുൺ നേടി. വെറും 65,000 രൂപ മാത്രം ചിലവാക്കിയ ആ മൂന്ന് മാസത്തെ കൃഷിയിൽ നിന്ന് ലഭിച്ച 1,80,000 രൂപയുടെ അറ്റാദായം അരുണിന്റെ കഠിനാധ്വാനത്തിന് മണ്ണ് നൽകിയ അംഗീകാരമായിരുന്നു.

മാതൃകയാക്കാം നമുക്ക് അരുണിനെ

അരുൺ എസ്. നായരുടെ ഈ വിജയം  കേവലം ഒരു വ്യക്തിയുടെ വിജയമല്ല, മറിച്ച് മണ്ണുപേക്ഷിച്ചു പോകുന്ന ഒരു തലമുറയ്ക്കുള്ള ശക്തമായ മറുപടിയാണ്. തോറ്റുപോയേക്കാവുന്ന ഓരോ ഘട്ടത്തിലും തന്റെ ആത്മവിശ്വാസത്തെ കൈമുതലാക്കി  മാറ്റിയ അരുൺ, കൃഷി ഒരു ഭാഗ്യപരീക്ഷണമല്ലെന്നും മറിച്ച് കൃത്യമായ പ്ലാനിംഗിലൂടെ വിജയിപ്പിക്കാവുന്ന ഒരു ബിസിനസ് ആണെന്നും തെളിയിച്ചു.

യന്ത്രവൽക്കരണവും ശാസ്ത്രീയ കൃഷിരീതികളും കൃത്യമായ വിപണന തന്ത്രങ്ങളും ഒത്തുചേർന്നപ്പോൾ അരുൺ മണ്ണിൽ നിന്ന് കൊയ്തെടുത്തത് കേവലം  സാമ്പത്തിക  ലാഭം മാത്രമല്ല, .  അത് കൃഷിയിലേക്ക് വരാൻ മടിക്കുന്ന ആയിരക്കണക്കിന് യുവാക്കൾക്ക് ഒരു വലിയ വെളിച്ചമാവുകയാണ്. ആധുനിക സാങ്കേതികവിദ്യയും പരമ്പരാഗതമായ അധ്വാനശീലവും ഒത്തുചേർന്നാൽ കേരളത്തിന്റെ മണ്ണിൽ ഇനിയും  പൊന്നുവിളയുന്ന ഇടമാക്കി മാറ്റാമെന്ന് ഈ യുവകർഷകൻ നമുക്ക് കാണിച്ചുതരുന്നു.

പരാജയങ്ങളിൽ നിന്ന് പാഠം ഉൾക്കൊണ്ട്, മണ്ണറിഞ്ഞു അധ്വാനിക്കുന്ന അരുണിന്റെ ഈ യാത്ര തുടരുകയാണ്—തളർന്നുപോകുന്ന കർഷകർക്ക് ഒരു നവീന മാതൃകയായും ഹരിത സ്വപ്നങ്ങൾ കാണുന്ന യുവത്വത്തിന് ഒരു വലിയ കരുത്തായും.