കേളത്തിന്റെ ജൈവ സമ്പത്തിന് മുതൽക്കൂട്ട്; നെല്ലിയാമ്പതി മലനിരകളിൽ പുതിയിനം കാശിതുമ്പ കണ്ടെത്തി; വംശനാശ ഭീഷണി നേരിടുന്ന അപൂർ‌വയിനം സസ്യം

കേളത്തിന്റെ ജൈവ സമ്പത്തിന് മുതൽക്കൂട്ടായി നെല്ലിയാമ്പതി മലനിരകളിൽ‌ നിന്ന് പുതിയ ഇനം കാശി തുമ്പയെ കണ്ടെത്തി. മിന്നാം പാറയിൽ നിന്ന് കണ്ടെത്തിയ, ഇംപേഷിയൻസ് ജനുസ്സിൽ നിന്നുള്ള ഈ സസ്യത്തിന് Impatiens minnamparensis എന്നാണ് പേര് നൽകിയിരിക്കുന്നത്. കാസർകോട് ഗവൺമെൻ്റ് കോളേജ് പ്രിൻസിപ്പൽ ഡോ. അനിൽകുമാറിൻ‌റെ മേൽനോട്ടത്തിലായിരുന്നു പഠനം.

പാൽ വെള്ള മുതൽ പിങ്ക് കലർന്ന പൂക്കൾ ഇവയുടെ പ്രത്യേകതയാണ്. 4-10 സെൻ്റിമീറ്റർ ഉയരമാണ് പുതിയ കാശി തുമ്പയ്ക്കുള്ളത്. ഒറ്റ പൂക്കളുള്ള പൂങ്കുലകളും ചെറുതും തടിച്ചതുമായ കായകളും ഇതിൻ‌റെ മാത്രം സവിശേഷതയാണ്. വംശനാശ ഭീഷണി നേരിടുന്ന സസ്യ വിഭാഗമാണ് ഇത്. അന്താരാഷ്ട്ര സസ്യശാസ്ത്ര ജേണൽ ആയ ഫൈട്ടോടാക്സയുടെ ഏറ്റവും പുതിയ ലക്കത്തിൽ പഠനം പ്രസിദ്ധീകരിച്ചിട്ടുണ്ട്.

മിന്നാംപാറയിലെ പാറകൾ നിറഞ്ഞ പുൽമേടുകളിൽ 2021-ൽ നടത്തിയ ഒരു സർവേയിൽ ആണ് ഇതിനെ ആദ്യം കണ്ടെത്തിയത്. അതിൻ്റെ രൂപഘടനയും മറ്റ് പശ്ചിമഘട്ട ബാൽസങ്ങളുമായി താരതമ്യപ്പെടുത്തലും പഠനങ്ങൾക്കും ശേഷം ഇത് ശാസ്ത്രലോകത്തിന് അന്നേ വരെ അപരിചിതം ആയൊരു സസ്യമാണെന്ന് സ്ഥിരീകരിക്കുകയായിരുന്നു.

കോയമ്പത്തൂരിലെ PSG കോളേജ് ഓഫ് ആർട്സ് & സയൻസിൽ നിന്നുള്ള ഡോ. ആര്യ സിന്ധു ആണ് പഠനത്തിന് നേതൃതം നൽകിയത്, പാലക്കാട് ഗവൺമെൻ്റ് വിക്ടോറിയ കോളേജിലെ അംബിക, അലൻ അലക്‌സ് ഫിലിപ്പ്; ഡോ. സോജൻ ജോസ്, ഡോ. സുരേഷ് വി എന്നിവരും പഠനത്തിൽ പങ്കാളികളായിരുന്നു.