വെണ്ടകൃഷിക്കെന്തു വേനലും വർഷവും

വേനൽക്കാലം ആയാലും മഴക്കാലം ആയാലും ഒരു പോലെ കൃഷി ചെയ്യാവുന്ന പച്ചക്കറി വിളയാണ് വെണ്ട.

അന്താരാഷ്ട്ര തലത്തിൽ Okra എന്നും വിളിക്കും.

നമ്മുടെ ചെമ്പരത്തിയുടെ കുടുംബക്കാരൻ.
Malvaceae തറവാട്. (ഇലയുടെ വഴു വഴുപ്പും പൂക്കളുടെ ആകൃതിയും ഓർക്കുക).

വെണ്ടയിലെ ഇല ചുരുട്ടി പുഴുവിന്റെ ചിന്നവീടാണ് ചെമ്പരത്തി. രണ്ട് ചെടികളിലും ഈ കീടത്തെ കാണാം.

വെണ്ടയുടെ പോഷക ഗുണങ്ങൾ കേട്ടാൽ നമിക്കും

ഗ്ലൈസെമിക് ഇൻഡക്സ് 20 ആയതിനാൽ diabetic patients ന് ഇവൻ നൻപൻ.

Pectin പോലെ ഉള്ള ദഹന നാരുകളാൽ സമൃദ്ധം ആയതിനാൽ cholesterol അടിഞ്ഞു കൂടാതെ വേഗം ശരീരം കാലിയാക്കും. മലബന്ധവും പമ്പ കടക്കും.

Folic ആസിഡിന്റെ ധാരാളിത്തം മൂലം ഇവൻ ഗർഭിണികളുടെ പ്രിയതോഴൻ.

Iodine കലവറ ആകയാൽ Goitre വരാതെ കാക്കും.

തൊലിക്ക് മിനുസം നൽകും.

ലൈംഗിക ജീവിതം ഉല്ലാസ പൂർണമാക്കും.

ഒരു പച്ചക്കറി ഇതിൽ കൂടുതൽ എന്ത് ചെയ്യണം എന്നാണ് നിങ്ങൾ പറയുന്നത്?

അന്നം തന്നെ മരുന്ന്..

ആയതിനാൽ പോയി പത്തു ഗ്രോ ബാഗോ ചട്ടിയോ ചാക്കോ വാങ്ങി വെണ്ട കൃഷി ചെയ്യാൻ നോക്കുകയല്ലേ?

മഴക്കാലം ആണ് ഏറ്റവും അനുയോജ്യം.
മെയ്‌ മാസം വിത്തിടാൻ കേമം.ഇപ്പോൾ തുടങ്ങാം..

മഴക്കാല കൃഷിയിൽ പക്ഷെ അകലം അല്പം കൂട്ടണം. വരികൾ തമ്മിൽ രണ്ടടി. വരിയിലെ ചെടികൾ തമ്മിൽ ഒന്നരയടി.

വേനൽ കാലത്ത് ചെടികൾ തമ്മിൽ ഒരടി ആയാലും മതി. വളർച്ച അല്പം കുറവായിരിക്കും.

വേര് ജട പിടിപ്പിക്കുന്ന നിമ വിരകളുടെ (Root Knot Nematode ) ശല്യം ജാസ്തി ആയതിനാൽ സെന്റിന് 3 കിലോ എന്ന അളവിൽ പൊടിച്ച വേപ്പിൻ പിണ്ണാക്ക് അടിവളമായി ചാണകപ്പൊടി, എല്ലു പൊടി എന്നിവയ്‌ക്കൊപ്പം ചേർത്ത് കൊടുക്കണം.

Paecilomyces lilacinus എന്ന ജീവാണു നിമാവിര നാശിനി അടിവളത്തോടൊപ്പം ചേർത്ത് കൊടുക്കുന്നതും നല്ലത് തന്നെ. ഇടയ്ക്കിടെ ബന്ദി ചെടികൾ (Marigold ) നട്ട് കൊടുക്കാം.

18:9:18 എന്ന NPK mixture ചെറിയ അളവിൽ അടിവളമായി, വേണമെങ്കിൽ നൽകാം.

നല്ല ഇനങ്ങൾ ഏതൊക്കെ എന്ന് നോക്കാം

അർക്ക അനാമിക: അഞ്ചു അരികുകൾ(edges) ഉള്ള പച്ച നിറത്തിലുള്ള ഇടത്തരം കായ്കൾ

പർബാനി ക്രാന്തി: കടും പച്ച നിറത്തിൽ ഉള്ള ഇടത്തരം കായ്കൾ

അർക്ക ആഭ

വർഷ ഉപഹാർ

സുസ്ഥിര :വീട്ടു വളപ്പിലെ കൃഷിക്ക് യോജിച്ച ഇനം .ദീർഘ നാൾ വിളവ് തരും

സൽക്കീർത്തി

ആനക്കൊമ്പൻ

അരുണ: ചുവന്ന വെണ്ടയ്ക്ക

ഇനി സങ്കരൻമാരും സങ്കരികളും

സാഹിബ (Hyveg Seeds)

സുൽത്താൻ (Hyveg Seeds )

രാധിക (Advanta Seeds)

Bhindi No 10 (Mahyco )

ഗർജ്ജന (East West Seed Company)

അരുണ (ചുവന്ന വെണ്ടയ്ക്ക )

സമ്രാട് (Samrat.Nunhems Seeds)

Radhe Radhe (Sanjeevani Seeds ) ഇങ്ങനെ നിരവധി.

നട്ടു 42-45 ദിവസമൊക്കെ ആകുമ്പോൾ വിളവെടുക്കാൻ തുടങ്ങാം.

രണ്ടു ദിവസത്തിൽ ഒരിക്കൽ വിളവെടുക്കണം.

കായ മുറ്റിയാൽ മാർക്കറ്റില്ല. ‘അരി (വിത്ത്) വയ്ക്കുന്നതിന് മുൻപ് കറി വയ്ക്കണം’ എന്നറിയാമല്ലോ.

മൂന്ന് വിളവെടുപ്പ് കഴിയുമ്പോൾ ഒരു മേൽവളം നൽകണം.

ഒരു ചെടിയിൽ നിന്നും 25-30 കായ്കൾ വരെ പറിക്കാം.

വിത്ത് 6-12 മണിക്കൂർ കുതിർത്തിട്ടു വിതച്ചാൽ വേഗം മുള വരും.

രാവിലെ വിളവെടുക്കണം. തലേന്ന് രാത്രിയിൽ ചെടി കുളിർക്കെ നനച്ചു രാവിലെ വിളവെടുത്താൽ കായ്കൾക്ക് മിഴിവ് കൂടും.

കായ് തുരപ്പൻ പുഴു
തണ്ട് തുരപ്പൻ പുഴു
ഇല ചുരുട്ടി പുഴു
പച്ചത്തുള്ളൻ (Green Hopper, Jassid (
മണ്ഡരി
മീലിമൂട്ട
എന്നിവയാണ് പ്രധാന കീടങ്ങൾ

നരപ്പ് രോഗം
ഇലപ്പുള്ളി
പൊടിപ്പൂപ്പ്
എന്നിവയാണ് പ്രധാന രോഗങ്ങൾ.

കൃഷി തുടങ്ങുന്നതിന് മുൻപ് നിങ്ങളുടെ കൃഷി ഓഫീസറുമായി വെണ്ടയിൽ വരാവുന്ന രോഗകീടങ്ങളെ കുറിച്ചും നിയന്ത്രണമാർഗങ്ങളെ കുറിച്ചും ചോദിച്ചു മനസിലാക്കുക.അപ്പ (Ageratum conyzoides) എന്ന കളച്ചെടിയിൽ നിന്നും പലപ്പോഴും നരപ്പ് രോഗം പിടി പെടാം. ആയതിനാൽ തോട്ടം കളകളില്ലാതെ വൃത്തിയായി സൂക്ഷിക്കണം.

ചോളം ഇടവിളയായി ചെയ്യുന്നത് നല്ലതാണ്.

അപ്പോൾ നേരമായി, കാലമായി,

‘ഞങ്ങളും കൃഷിയിലേക്ക് ‘.

10 വെണ്ട ചെടി നട്ട് 250-300 കായ്കൾ പറിക്കാൻ തയ്യാറാവുക.

എഴുതി തയ്യാറാക്കിയത് -പ്രമോദ് മാധവൻ, കൃഷി ഡയറക്ടർ, ദേവികുളം ഇടുക്കി