കാർഷിക കയറ്റുമതി വിപുലീകരിക്കും; വിവിധ രാജ്യങ്ങളുമായി പങ്കാളിത്തം വർദ്ധിപ്പിക്കാനുള്ള ശ്രമങ്ങൾ നടത്തുകയാണ്; അഗ്രിടെക് സ്റ്റാർട്ടപ്പുകൾ ഇന്ത്യയുടെ തലവര മാറ്റിയെന്ന് കേന്ദ്ര കൃഷി മന്ത്രി

ന്യൂഡൽഹി: ആഗോള ഭക്ഷ്യോത്പാദന മേഖലയിലെ പ്രധാനിയായി രാജ്യം മാറുന്നുവെന്ന് കേന്ദ്ര കൃഷിമന്ത്രി ശിവരാജ് സിംഗ് ചൗഹാൻ. കാർഷിക സാങ്കേതിക വിദ്യകൾ നവീകരിക്കാനും വിതരണ ശൃംഖലകൾ കാര്യക്ഷമമാക്കാനും നിക്ഷേപങ്ങൾ നടത്തിയിട്ടുണ്ടെന്നും കേന്ദ്രമന്ത്രി പറഞ്ഞു.

കാർഷിക ഉൽപാദനക്ഷമത വർദ്ധിപ്പിക്കാനും രാജ്യത്തിനും പുറത്തും ഭക്ഷ്യസുരക്ഷ ഉറപ്പാക്കാനും ലക്ഷ്യമിട്ടുള്ള വിവിധ സംരംഭങ്ങൾ സർക്കാർ അവതരിപ്പിച്ചു. കാർഷിക കയറ്റുമതി വിപുലീകരിക്കാൻ ഇന്ത്യ വിവിധ രാജ്യങ്ങളുമായി പങ്കാളിത്തം വർദ്ധിപ്പിക്കാനുള്ള ശ്രമങ്ങൾ നടത്തുകയാണെന്നും മന്ത്രി പറഞ്ഞു. പരിസ്ഥിതി സംരക്ഷണത്തിന് ഊന്നൽ നൽകിക്കൊണ്ട് ജൈവകൃഷി, കാര്യക്ഷമമായ ജല ഉപയോഗം തുടങ്ങിയ രീതികൾ സർക്കാർ പ്രോത്സാഹിപ്പിക്കുന്നു. അഗ്രിടെക് സ്റ്റാർട്ടപ്പുകളുടെ വരവോടെ സംരംഭകത്വ കുതിപ്പിനും രാജ്യം സാക്ഷ്യം വഹിക്കുന്നുവെന്നും അദ്ദേഹം കൂട്ടിച്ചേർത്തു.

ഭാവിയിലെ ആഘാതങ്ങളെ ചെറുക്കാൻ ശേഷിയുള്ള കാർഷിക സംവിധാനങ്ങൾ കെട്ടിപ്പടുക്കുന്നതിന് ദീർഘകാലാടിസ്ഥാനത്തിലുള്ള ആസൂത്രണം ആവശ്യമാണ്. കരുതലോടെയും ചിന്താപൂർവ്വമായും നിക്ഷേപം നടത്തുന്നതിലൂടെ, ഇന്ത്യയുടെ കാർഷിക ശേഷിയും ഭക്ഷ്യസുരക്ഷയും മാറ്റാൻ കഴിയുമെന്ന് അദ്ദേഹം പറഞ്ഞു. വിള പ്രതിരോധത്തിനായി രാജ്യം നൂതനമായ പരിഹാരങ്ങൾ തേടുന്നതിനാൽ ബയോടെക്നോളജി ഗവേഷണത്തിലേക്കുള്ള നിക്ഷേപവും പ്രധാനമാണെന്നും ചൗഹാൻ വ്യക്തമാക്കി.

The Union Agriculture Minister said that India is making efforts to increase partnerships with various countries to expand agricultural exports