ഹാസ് -അവക്കാഡോയിലെ കേമന്‍

നമ്മുടെ നാട്ടില്‍ അത്ര പ്രിയതരമല്ലെങ്കിലും വിദേശങ്ങളില്‍ ഏറ്റവും പ്രിയപ്പെട്ട പഴങ്ങളില്‍ ഒന്നാണ് വെണ്ണപ്പഴം അഥവാ അവക്കേഡോ. ജ്യൂസ്, ഷേയ്ക്ക്, ഫ്രൂട്ട് സലാഡ് എന്നിവയില്‍ ആണ് കൂടുതലായും ഉപയോഗിക്കുന്നത്. 21 ഡിഗ്രി മുതല്‍ 37 ഡിഗ്രി വരെ  റേഞ്ചില്‍ ഉള്ള ചൂട് സഹിക്കുന്ന ഇനങ്ങള്‍ ആണ് സമതല കൃഷിയ്ക്ക് യോജിച്ചത്.

അവോകാഡോ കൃഷി ചെയ്യുമ്പോള്‍ എപ്പോഴും രണ്ട് മരമെങ്കിലും നടണം. കാരണം ‘Protogynous dichogamy ‘എന്ന സവിശേഷമായ ഒരു പ്രതിഭാസം അതിന്റെ പൂക്കള്‍ പ്രകടിപ്പിക്കുന്നു. ഒരേ പൂവില്‍ തന്നെ ആണ്‍ -പെണ്‍ അവയവങ്ങള്‍ ഉണ്ടെങ്കിലും അവ പ്രജനനത്തിനായി സജ്ജമാകുന്നത് വ്യത്യസ്ത സമയങ്ങളില്‍ ആണ്. പൂവിലെ പെണ്‍ ഭാഗം രാവിലെ തുറക്കുമ്പോള്‍ കേസരങ്ങള്‍ സജ്ജമാകില്ല. കേസരങ്ങള്‍ ഉത്സര്‍ജ്ജിക്കുമ്പോള്‍ പരാഗരേണുക്കള്‍ സ്വീകരിക്കേണ്ട പെണ്‍ഭാഗം അടയും.

എത്ര വിചിത്രം? പര പരാഗണം പ്രോത്സാഹിപ്പിക്കുന്നതിനുള്ള പ്രകൃതിയുടെ തനത് രീതികള്‍

അതിലൂടെ വര്‍ഗ വൈവിധ്യം ഉറപ്പ് വരുത്തുന്നു എന്നും പറയാം.

ഈ സവിശേഷതയെ അടിസ്ഥാനപ്പെടുത്തി A type, B type എന്ന രീതിയില്‍ ഇനങ്ങളെ വര്‍ഗീകരിച്ചിരിക്കുന്നു. ഒരേ സമയം ആണ്‍ പെണ്‍ അവയവങ്ങള്‍ പ്രവര്‍ത്തനക്ഷമമാകുന്നതിനാണ് രണ്ട് ചെടികള്‍ നടണമെന്നും അവയില്‍ ഒന്ന് Type A യും മറ്റൊന്ന് Type B യും ആകണമെന്നും നിര്‍ദേശിക്കുന്നത്.

ലോകത്ത് ഏറ്റവും പ്രിയമുള്ള അവോക്കാഡോ ഇനമാണ് ഹാസ് (Hass).അമേരിക്കയില്‍ വില്‍ക്കപ്പെടുന്ന 80 ശതമാനവും ഈ ഇനമാണ്. കടും പച്ച നിറമുള്ള, പരുപരുപ്പുള്ള തൊലിയാണിതിന്. പൂര്‍ണമായും പഴുത്ത് കഴിയുമ്പോള്‍ ഇളം ബ്രൗണ്‍ നിറമാകും.

കാലിഫോണിയ യിലെ റുഡോള്‍ഫ്  ഹാസ് എന്ന പോസ്റ്റ്മാന് ആണ് 1935ല്‍ ഇതിന്റെ പേറ്റന്റ് ലഭിച്ചത്. അന്ന് വരെ Fuerte എന്ന ഇനമാണ് വിപണി വാണുകൊണ്ടിരുന്നത്. Rudolf Haas യഥാര്‍ഥത്തില്‍, താന്‍ മറ്റൊരാളില്‍ നിന്നും വാങ്ങിയ ഭൂമിയില്‍ വളര്‍ന്ന ഒരു അവക്കേഡോ മരം മികച്ചത് എന്ന് കണ്ടെത്തി അത് സ്വന്തമാക്കി പ്രചരിപ്പിക്കുകയായിരുന്നു.

ഇസ്രായേല്‍ ഇന്ന് ഈ ഇനം വ്യാപകമായി കൃഷി ചെയ്യുന്നുണ്ട്.

കുരു മുളപ്പിച്ച ഇനങ്ങള്‍ കായ് ഫലമെത്താന്‍ ഏഴ് മുതല്‍ പത്ത് വര്‍ഷം വരെ എടുത്തേക്കാം. എന്നാല്‍ ഗ്രാഫ്റ്റ് ചെയ്ത തൈകള്‍ 3-4വര്‍ഷത്തില്‍ കായ് പിടിക്കും. നീര്‍ വാര്‍ച്ച കുറഞ്ഞ ഇടങ്ങളില്‍ നടുന്നത് ഒഴിവാക്കണം. സൂക്ഷ്മ മൂലകങ്ങള്‍ അടക്കമുള്ള വളങ്ങള്‍ രണ്ട് മാസത്തില്‍ ഒരിക്കല്‍ ചെറിയ തവണകളായി കൊടുക്കുന്നത് കൂടുതല്‍ ഗുണം ചെയ്യും. നല്ല വെയില്‍ ഉള്ള സ്ഥലങ്ങള്‍ തന്നെ നടാന്‍ തെരെഞ്ഞെടുക്കണം.

തയ്യാറാക്കിയത് 

പ്രമോദ് മാധവന്‍
കൃഷി ഓഫീസര്‍
ചാത്തന്നൂര്‍ കൃഷിഭവന്‍