കുറഞ്ഞ സ്ഥലത്ത് കുറഞ്ഞ മുതല്‍മുടക്കില്‍ കൃഷി ചെയ്യാവുന്ന ഒന്നാണ് പേര. ഉഷ്ണാമേഖലാ പ്രദേശത്താണ് പേരമരം കൃഷി ചെയ്യാന്‍ അനുയോജ്യം. നന്നായി വളം ചെയ്യുകയും വേനല്‍കാലത്തു നനയ്ക്കുകയും നല്ല സൂര്യപ്രകാശം ലഭിക്കുകയും ചെയ്താല്‍ വിളവ് പതിന്മടങ്ങ് വര്‍ധിക്കും. ഇന്ത്യയില്‍ ആന്ധ്രപ്രദേശ്, മഹാരാഷ്ട്ര, മദ്ധ്യപ്രദേശ്, ഗുജറാത്ത്,ബീഹാര്‍, തമിഴ്നാട് എന്നിവിടങ്ങളില്‍ വ്യാപകമായി പേര കൃഷി നടക്കുന്നുണ്ട്. അലഹബാദ് സഫേദ്, സര്‍ദാര്‍ (ലക്നൗ-49), ചിട്ടിദാര്‍, റെഡ് പ്ലെഷ്ഡ് (ചുവന്ന കാമ്പുള്ളത്), സീഡ്ലെസ്, അനക്കപ്പള്ളി, ബനാറസി, ഹഫ്സി, സ്മൂത്ത്, ഗ്രീന്‍ സ്മൂത്ത്, വൈറ്റ്,സഫ്രിയോര്‍, പെയില്‍ അലഹബാദ്, ധാര്‍വാര്‍ എന്നിവ മികച്ചയിനങ്ങളാണ്. പേരമരത്തിന് സാധാരണ ഗതിയില്‍ 30 വര്‍ഷം മുതല്‍ 50 വര്‍ഷം വരെ ആയുസുണ്ട്.
മിതമായ രീതിയില്‍ മഴ (100 സെ. മീ) ലഭിക്കുന്ന സ്ഥലത്താണ് പേരയ്ക്ക നന്നായി വളരുന്നത് എന്നാല്‍ മഴ കൂടുതല്‍ ലഭിക്കുന്ന സ്ഥലങ്ങളിലെ പേരയ്ക്കയ്ക്ക് രുചിയും, ഗുണവും കുറയും. എല്ലാ മണ്ണിലും നന്നായി വളരുന്ന പേരയ്ക്ക വാണിജ്യാടിസ്ഥാനത്തില്‍ കൃഷി ചെയ്യാന്‍ നീര്‍വാര്‍ച്ചയുള്ള മണല്‍ കലര്‍ന്ന പശിമയുള്ള മണ്ണാണ് നല്ലത്. ജൂണ്‍ – ജൂലായ് മാസങ്ങളാണ് തൈകള്‍ നടുന്നതിന് മികച്ച സമയം. തോട്ടമായിട്ടാണ് കൃഷി ചെയ്യുന്നതെങ്കില്‍ തനിവിളയായും ഇടവിളയായും പരീക്ഷിക്കാവുന്നതാണ് പേര കൃഷി. വിത്തുമൂലം തൈകള്‍ ഉണ്ടാക്കാം. തൈകള്‍ മാതൃസസ്യത്തിന്റെ അതെ ഗുണങ്ങള്‍ നിലനിര്‍ത്തില്ല എന്നതുകൊണ്ട് വായുവില്‍ പതിവയ്ക്കുന്ന രീതിയാണ് (air layering) സാധാരണ ചെയ്ത് വരുന്നത്. പതിവെയ്ക്കല്‍ വഴിയാണ് മികച്ചയിനങ്ങള്‍ ഉണ്ടാക്കുന്നത്. ഇതിലൂടെ മൂന്നാഴ്ചകൊണ്ട് തൈകള്‍ ഉണ്ടാക്കുവാന്‍ കഴിയും
നടീല്‍രീതികള്‍
ആറു മീറ്റര്‍ അകലത്തില്‍ ഒരു മീറ്റര്‍ ആഴവും വീതിയും നീളവുമുള്ള കുഴികള്‍ എടുത്ത് ചാണകവും മേല്‍മണ്ണും മണലും ചേര്‍ത്ത മിശ്രിതം കൊണ്ട് കുഴി നിറയ്ക്കുക. ഈ കുഴികളില്‍ വേണം ചെടികള്‍ നടാന്‍. നട്ടശേഷം പുതവയ്ക്കുന്നത് നല്ലതാണ്. ആവശ്യമെങ്കില്‍ താങ്ങ് കൊടുക്കണം. വേനല്‍ക്കാലമാണെങ്കില്‍ നന്നായി നനച്ചു കൊടുക്കണം.
വളപ്രയോഗം
കായ്ച്ച് തുടങ്ങിയ ഒരു പേരയ്ക്ക് ഒരു വര്‍ഷം ഏകദേശം 80 കി. ഗ്രാം കാലിവളം, 434 ഗ്രാം യൂറിയ, 444 ഗ്രാം മസ്സൂറിഫോസ്, 434 ഗ്രാം പൊട്ടാഷ് എന്നിവ വേണം. ഇത് രണ്ട് മൂന്ന് തവണകളായി മണ്ണില്‍ ഈര്‍പ്പം ഉള്ളപ്പോള്‍ ചേര്‍ത്തുകൊടുക്കണം. ആദ്യഘട്ടത്തില്‍ ഒരു ചെടിക്ക് 217 ഗ്രാം യൂറിയ, 222 ഗ്രാം മസ്സൂറിഫോസ് , 217ഗ്രാം പൊട്ടാഷ് എന്നിവ മെയ്-ജൂണ്‍ മാസങ്ങളില്‍ നല്‍കുക. രണ്ടാംഘട്ടമായി 217 ഗ്രാം യൂറിയ, 222 ഗ്രാം മസ്സൂറിഫോസ്, 217 ഗ്രാം പൊട്ടാഷ് എന്നിങ്ങനെ ഒരു ചെടിക്ക് നല്‍കുക. പുളിരസമുള്ള മണ്ണില്‍ രാസവള പ്രയോഗത്തിന് രണ്ടാഴ്ച മുന്നേ കുമ്മായം/ ഡോളമൈറ്റ് മണ്ണില്‍ ചേര്‍ത്തുകൊടുക്കുക. തൈകള്‍ നട്ട് നാല് വര്‍ഷത്തിനുള്ളില്‍ കായ്കള്‍ ലഭിച്ചുതുടങ്ങും. ഫെബ്രുവരി, ജൂണ്‍, ഒക്ടോബര്‍ മാസങ്ങളിലാണ് പുഷ്പിക്കുന്നത്. 10 വര്‍ഷം പ്രായമുള്ള ഒരു മരത്തില്‍ നിന്നും ഒരു വര്‍ഷം 500 മുതല്‍ 800 കായകള്‍ വരെ ലഭിക്കും.
ജലസേചനംവേനല്‍ക്കാലമാണെങ്കില്‍ നന്നായി നനച്ചു കൊടുക്കണം. മിതമായ രീതിയില്‍ മഴ ലഭിക്കുന്ന സ്ഥലത്താണ് പേരയ്ക്ക നന്നായി വളരുന്നത്. മഴക്കാലത്ത് പഴങ്ങള്‍ ചീയുന്നതിനുള്ള സാധ്യത കൂടുതലാണ്.
Discussion about this post